Eren Keskîn: Tecrîdê Îmralî problemê Kurdî ra dûr nîyo 

2020-09-21 09:33:27


	 

	STENBOL - Hemsereka Pêroyî ya ÎHDyî Eren Keskîne dîyar kerd ke tecrîdo giran ke serê Rayberê PKKyî Abdullah Ocalanî de yo, problemê Kurdî ra dûr nîyo û vat: "Wa Dewleta Komara ya Tirkîya, huqûqî xo yê zereyîn û pêameyîşê ke îmza kerda bi ca bîyara."

	 

	Tecrîdo Giran ke serê Rayberê PKKyî Abdullah Ocalanî de 21 serrî yo dewam keno. Avûkat Rezan Sarica û Newroz Uysale bi muvekîlê xo Abdullah Ocalanî reyde 8 serrî ra dima 2-22ê Gulane, 12-18ê Hezîran û 7ê Tebaxa 2019 de pêvînayîş kerdibî. Pêvînayîşê peyîn ra heta nika pêwa bi desan muracatê Serdozgerîya Komare ya Bursayî, cewabê red ameyî girewtene.

	 

	Mehmet Ocalanî zî bi birayê xo Abdullah Ocalanî reyde tewr peyîn dimayê şewatê 2ê Adare de vejîyabi, pêvînayîş kerdib. Dimayê nê pêvînayîşî, reyna berê Îmralî ameyî padayene. Dimayê vîrusê koronayî, seba Abdullah Ocalan û hîrê hepsîyê ke uca de yê, hewte ra reyke, heqê pêvînayîşê 10 deqe ya telefonî ame dayene. La pêwa nê, nêame kerdene. 27ê Nîsane de yewin rey no heq ame xebitnayene. 21 serrî ra dima Abdullah Ocalanî bi keyeyî xo dir pêvînayîş kerd. Dimayê nê pêvînayîşê telefonî zî Abdullah Ocalan û hepsîyê bîn yê Îmralî ra zanayîş ame nêame girewtene.

	 

	Hemsereka Pêroyî ya ÎHDyî Eren Keskîne, derheqê babete de qisey kerde.  

	 

	Polîtîka û tecrîdê hemverê problemê Kurdan

	 

	Erene dîyar kerd ke roja Abdullah Ocalanî berdê zîndanê Îmralî, dewleta Tirkî hemverê huqûqê xo yê zere têgeyrena û pêwa pêro waştişan, derheqê rewşe de muxataban nêvînena. Erene wina vat: "Vernê de zî tecrîdêk pîl estbi. Ganî tecrîd a roje ra heta ewro, pîya bêro munaqeşekerdene. Seba ke roja ewil ra tecrîd û caardişê cîya bî. La prosesê aştîye estbi. O wext destûr seba pêvînayîşan ame dayene. Xeylê pêvînayîşî o wext ameyî kerdene."

	 

	'Hemverê huqûqî zereyî û pêameyîşê mîyanneteweyî yo'

	 

	Erene dîyar kerd ke ganî huqûq seba her kesî têduşt bi ca bîyarê û no tecrîdo ke Abdullah Ocalanî rê ameyo ferzkerdene tu hetê ci heqdar çin o û wina vat: "Heqê hepsîyan, qanûnan de dîyar ê. Pêvînayîşê bi keyeyî dir, avûkatan dir, xo resnayîşê belge, zanayîş û kitaban. Labelê derheqê Ocalan û hepsîyê verê ey de mekanîzmayêk ma nêzanê esto. Huqûqê zereyî yê Tirkîya hemverê pêameyîşê mîyanneteweyî yo.

	 

	'DMME qerarê derheqê berjewendîyê dewletan dano'

	 

	Erene dîyar kerd ke avûkatan xeylê rey, muracat kerdê la bêsebeb ameyê redkerdene û wina vat: "Dadgeha Heqê Merdiman ê Ewropayî (DMME) zî pawitişê heqê merdiman ra dûr, derheqê berjewendîyê dewletan de qerar danê. Serekê DMMEyî Robert Spoano 3ê êlule de bi Tirkîya dir pêvînayîş kerd. Pêwa ke no welatî de hende problemî yenê ciwîyene, nê problemî nêameyî qiseykerdene. No zî nîno famkerdene. Waştişê ma oyo ke huqûq û pêameyîşê mîyanneteweyî bi ca bêrê."