‘Cezaya ke Muhlîse rê ameye birnayene mesajêk dayî cinîyê Muşijan’ 

2020-09-20 15:21:24


	 

	WAN - Hepsîya nêweşe ya HDPyî Muhlîse Karaguzele ke rîskê çimanê xo do vindî bikera, esto bi îdiayê endamîya rêxistine ceza ci rê ameye birnayene. Parlamentera HDPyî ya Muşî Şevîn Coşkune dîyar kerd ke cezaya Muhlîse ke ameya birnayene, mesajêk seba Mûşijan o.

	 

	Hemsereka Partîya Demokratîkî ya Şaran (HDP) ya Mûşî ya verê Muhlîse Karaguzele (59) Muş de 10ê tebaxa 2019 de sereştişê keyeyî de ameye destbendkerdene û bi îdiayê ‘endamîya rêxistine’ ameye tepiştene. Muhlîse ke xeylê nêweşîyê aye kronîk estê, bi rîskê ke çimê xo vindî bikera rî bi rî ya. Roniştişê dewaya hepsîya nêweşe Muhlîse rojê vîyarte 2yîn Dadgeha Cezaya Giran ya Muşî ame kerdene. Roniştiş de bi sebebê endamîya rêxistinê 8 serrî û 3 mengî ceza ci rê birnayî.

	 

	Parlamentera Mûşî ya HDPyî Şevîn Coşkune reaksîyon vera cezaya Muhlîse de û vat: “Dimayê weçînayîşê 7ê Hezîrana 2015 ra dima îqtîdarî konseptê hêrişî da destpêkerdene û bi weçînayîşî dir 1ê teşrîna peyêne 2015 de û operasyonê sîyasî da destpêkerdene. Sewbîna 4ê teşrîna peyêne 2016 de zî hemserek û parlamenterê ma ameyî tepiştene û heta nika zî tepişte yê.”

	 

	Şevîne, dîyar kerd ke AKPyî 5 serrê peyîn de hemverê Şarê  Kurdî û bi pêroyî hemverê heme şaran polîtîkayê teda û zulmî kerdî û wina vat: “Nê polîtîkayê zulmî zî roj bi roje dewam kenê. Nê dir zî hêriş, destbendkerdiş û operasyonan kenê. Sey heme şaristanan, hemverê Mûşî de zî hêrişî estê. Hemsetekê ma yenê tepiştene. Endamê ma yenê tepiştene. AKP bi tedayan, îqtîdarê xo dewam keno.”

	 

	Şevîne bale ante serê cezaya Muhlîse û vat: “Serra vîyarte de embaza ma Muhlîse Karaguzele ameye tepiştene. Cezaya ke Muhlîse rê birnayî zî mesajêk seba cinîyê Mûşijan o. Seba vîrusî menga adare de Tirkîya de xeylê kesî merdî. Bêguman hepsî zî bi rîskêk pîl dir rî bi rî. Nêweşê kronîk estê. Ganî bê bazarkerdene, hepsîyê nêweşî serbest bêrê veradayene. Sere de Muhlîse û heme hepsîyê nêweşî bêrê veradayene.”