Hêrişê nasnameyî kenê! 

2020-09-20 14:08:13


	 

	Medya Uren

	 

	AMED - Hêrişê nîjadî yê Sakarya û Afyonî ke ameyî kerdene bi rojawanî sereyîn ê Kurdistanijan. Kurdê serrê 90 de seba polîtîkayê şerê taybetî mecbûr mendî koçber bê, sewbîna kurdê ke seba debara xo bikerê verê xo dabî şaristanê Tirkîya bi hêrişê nîjadî dir rî bi rî manenê. Nê hêrişî zî sey polîtîkayêk yenê kerdene, kiştox û hêrişkar qetî nînê muhakemekerdene.

	 

	Seba polîtîkayê şerî yê taybet yê serrê 90an bi hezaran keyeyî koçberê metrepolan bî. Koçberî, feqîrî û bêkarî her wext bi pare Kurdan. La gama ke vatî, ma Kurd ê tewr zêde hêrişê xidarî dir rî bi rî mendî. Seba ferasetê dewlete ya hemverê herême zî xeylê ciwan verê xo danê şaristanê Tirkîya û uca de karê tewr zehmet de xebityenê. Reyna karkerê mewsîmî zî bi keyeyê xo dir seba debara xo kewenê rayîr û şonê şaristanê tirkan. Verê cuya zehmete bi hêrişê nîjadî dir zî rî bi rî manenê. Ê kesî seba nasnameyê xo yenê derbkerdene.

	 

	Ma do hedîseyê ke bi taybetî zî rojeve de mendê bîyarê ziwan. Sewbîna xeylê hedîse estê ke qet nêkewtê rojeve, seke hedîseyê rêze û yan zî kiştişêk rêze ra ameyî ercnayene.

	 

	* Şîrîn Tosun 19 serre bi û bi keyeyê xo dir şi Sakarya û uca de karê mewsîmî kerdêne, seba ke bi kurdî qisey kerd, hetê 6 nîjadperestê tirkî ra rastê hêrişê çekî ame. Şîrîn, dimayê 54 rojan dinyaya xo bedilna. Kiştoxî hema zî nêameyî muhakemekerdene.

	 

	*15 teşrîne verêne 2019 de Ekrem Yaşlı (74) ke nêweşxaneyê Çanakaleyî de tedawî dîne, seba ke Kurdkî qisey kerd hetê nîjadperesto bi nameyê Hakan Kalmaoglu (22) ra rastê şîdetî ame. Ekrem birîndar bi û dimayê ke îfadeyê hêrişkarî ame girewtene serbet ame veradayene.

	 

	*31ê gulana 2020 de Barış Çakano 20 serre ke Agirî ra bi, seba ke deyîra kurdkî goşdarî kerd, Enqere de hetê komêk ra rastê hêrişî ame û ame kiştene. Dimayê ke hedîse vejîya werte, dewlete hewl da ke binimno. Waştî ke sey kiştişêk rêze ramojnê.

	 

	*14 hezîarana 2020 de Gîresûn de Osman Înan bi îdayê ke fotografê Selahadîn Demîrtaşî pare kerdo, hetê komêk 60 kesî ra rastê hêrişî ame.

	 

	* 15ê temmuze  2020 de Şirnex de çawişp pispor A.A hewl da ke tecawuzê domana 10 serrî bikero, hetê derûdorî ra ame tepiştene. Labelê dimayê ke îfade da û bi sebebo ke alkol girewt serê hedîse ame girewtene.

	 

	* 15ê temmuze 2020 de Îpek Ere Beşîrî de seba ke çawîşo pispor Mûsa Orhanî tecawuz kerd, întîxar kerde. Îpek Ere nêweşxane de dinyaya xo bedilna û Mûsa Orhan zî serbest ame veradayene.

	 

	*4ê êlûle de keyeyê Demîrî yê ke seba karê mewsîmî Mêrdîn ra şî Sakarya, uca de rastê şîdetê komêke nîjadî ameyî. Keyeyo ke bi kardan ameyî tehdîdkerdene, mecbûr mendî şaristan terk bikerê. 

	 

	*13ê êlule 2020 de qezaya Dînarî girêdayê qezaya Afyonî ciwanêk kurd yê Erdîşij rastê hêrişê nîjadî ame. Netîceyê hêrişî de Ozkan T. dinyaya xo bedilna. Firat T. û Emrah O. zî birîndar bî.

	 

	* Dogan Çetîn ke Edîrne de leşker bi vat, “Werrekna mi perwerdeyê kurdkî bidîne” rastê hêrişê nîjadperest ê 2 leşkeran ame. Doganî zî dîyar kerd ke xeylê fermandarê înan zî paştdayîş dayî hêriş.