Atolya Kultur û Hunerî ya Aryenî de demo newe dest pêkerd 

2020-09-18 13:51:25


	 

	WAN - Atolya Kultur û Hunerî ya Aryenî ke bi ziwanê înan yê perwerdeyê kurdî û bi pandemî de mabêne dabî xebatanê xo, demo newe de dest bi dersê xo yê yew kesî kerd.

	 

	Seba vîrusê korona, xeylê sazgeh û dezgehî faliyetê xo mecbûr mendî ke bidê vindarnayene. Wan de Atolya Kultur û Hunerî ya Aryenî zî prosesê pandemî de xebatê xo vindarnayî. Nika Atolye reyna qursê resim, muzîk, tîyatro ameyî destpêkerdene û ziwanê perwerde zî kurdî yo.

	 

	Zozan Abîya ke atolye de mamosteya resimî ya, dîyar kerd ke prosesê pandemî de 4 mengan xebate dayî vindarnayene û vat, no proses hetê înan ra zaf zehmet derbaz bîyo û wina dewam kerd: “Dimayê ke proses peynî bi ma reyna dest bi xebatan kerd. Perwerdeyê ma komî nîyê. Do bi yew kesî dewam bikero. Ma tedbîrê xo gênê.”

	 

	Ziwanê perwerdeyî Kurdî yo

	 

	Zozane dîyar kerd ke ê hewl danê ke domanê mabêne emrê 2 û 5 serrî de perwerdeyê xo bigîrê û wina vat: “Ma perwerdeyê xo bi ziwanê Kurdî danê. Wan de sera 90 sazgehî perwerde bi kurdî nêdanê. Coka ma hewce dî.”

	 

	‘Ganî her doman bi ziwanê xo pîl bibo’

	 

	Zozane wina qedêna: “Amancê ma oyo ke domanî ziwanê xo qisey bikerê. Her ca de Tirkî yena qiseykerdene. Eke Kurdî nêbo ziwanê perwerde û wareyê fermî de nêra xebitnayene, qiseykerdiş do dayîk û pî dir zî qels bimano. Coka ganî sazgehê ke kultur û hunerê kurdan danê ciwîyayîş zêde bê. Ganî her domanek bi ziwanê xo pîl bibo. Ma veng danê keyeyan ke bi domananê xo dir beşdarê atolya ma bibê.”