Ozlema ke bi şîdetî dir rî bi rî mendêne: Ma wayîrê Pêameyîşê Stenbolî vejîyê 

2020-09-18 13:28:23


	 

	WAN - Ozlem Koça ke 13 serrî bi şîdetê sîstematîkî dir rî bi rî mendêne û netîceyê mucadeleyê xo bi ser kewte, dîyar kerd ke prosesê veradayîşî de rêxistinê cinîyan nas kerd û mucadeleyê cinîyan ra cesaret girewta. Ozleme dîyar kerd ke vat, hemverê şîdet û tecawizan ganî cinî dorê Pêameyîşê Stenbolî de bê û wayîr vejîyê.

	 

	Cinîya bi nameyê Ozlem Koça 25 serrî cinîyêka rastê şîdetê sîstematîkî yê camêrdo ke ci dir zewicnayîbî ameye. Ozleme 13 serran şîdetê fîzîkî, ekonomî, komelî û psîkolojîk vînena, prosesê veradayîşî de zî rêxistinê cinîyan nêzdî ra taqîb kena û cesaret ci ra gêna. Ozleme fek camêrdê xo ra vera da û domananê xo dir têkoşînê cuye dana.

	Ozleme bale ante serê munaqeşeyê derheqê ke Pêameyîşê Stenbolî bêro antiş de û dîyar kerd ke hukmê Tirkîya gumanbaran paweno, la cinîyan nêpaweno.

	 

	‘13 serrî seba domananê xo bêveng menda’

	 

	Ozlema ke dayîka di domanana 20 serrîya xo de zewicyena û 13 serrî zewicnaye manena, her wext rastê şîdeta psîkolojîk yena. Ozleme wina vat: “Ma her wext munaqaşe kerdêne. Şîdetê psîkolojîk zaf zêde bi. Her tim vatêne, ‘ez to nêwazena, wazena fek to ra vera bidî.’ Verê kesê bînan de zî vatêne, ‘nê zuran kena, ez çîyêk wina nêvana.’ No şîdeto psîkolojîk ê fîzîkî ra xerabêr bi. 13 serrî yo mi mucadele seba domananê xo da. Mi her wext keyeyê ci ra vatêne. Ey zî vatêne, ‘ez bi zorê keyeyê xo zewicyaya.”

	 

	‘Rastê şîdetê fîzîkî û cinsî ameya’

	 

	Ozleme dewam de dîyar kerd ke rastê şîdetê fîzîkî ameya la bi desan rey rastê şîdetê cinsî ameya û vat: “Ez şîya nêweşxane. Mi vat gelo problem mi dir esto? Mi dest bi dermanê ke merdimî rehet kenê kerd. Mi prosesê veradayîşî de fam kerd ke heqê cinîyan esto. Cuyêka mi komelî çinbî. Coka mi çîyêk nêzanayîne. Mi nêzanayîne cinî pîya mucadele kenê. Mi medyaya komelî de nê çî dî û mi ci ra cesaret girot.”

	 

	‘Dewlete nêpawena’

	 

	Ozleme şîdet û kiştişê cinîyan ke zêde bîyo ercna û vat: “Cinî bêtenayî û bêwayîrbîyayîşî ra tersenê. No zî cesaret dano camêrdan. Reyan keyeyî wayîr nêvejîyenê, dewlete nêpawena. Gumanbaran ceza nêkena. Coka zî şîdet û qetilkerdiş dewam keno. Ganî dewlete her şertî de verê cinîyan de bo. Ma eşkenê pêro cinîyan dorê Pêameyîşê Stenbolî bibê yew û pîya serkewte bê.”