Bi sebzeyê ke wişk kena debara xo kena 

2020-09-16 14:05:11


	 

	WAN - Hulya Ulgena ke Taxa Kale ya Wanî de dest bi amadekarîyê zimistanî kerd, hetêk ra sebzeyan wişk kena û hetêk ra zî bi nê sebzeyê wişk kena derbara xo kena.

	 

	Bi xelasbîyayîşê mewsîmê hamnanî dir xeylê ca de amadekarîyê zimistanî dest pêkerd. Seba werdê zimistanî, sebze yenê wişkkerdiş û heme zî bi keda cinîyan yenê kerdene. Taxa Kale ya Îpekyolê Wanî, Hulya Ulgena 38 serrî îsot, balîcan, firingî û kuwan wişk kena. Hulya verê nê de fêkîyê sey sa, miro û xewxan wişk kena û nê zî benê çimeyê debara ci. Hulya dîyar kerd ke seranserê zimistanî bi zerrêka weş wişkkerdişê xo xebitnenê û bale ante serê krîzê ekonomî.

	 

	‘Keda mi qîmê heme zimistanî kena’ 

	 

	Hulya dîyar kerd ke zimistanî zî sebze estê, la seba organîk ê, sebzeyê baxçeyê xo yê sey balîcan, îsot, kuwe, firingî û fasulîyan wişk kena û wina vat: “Ez nê sebzeyan şorbe, tirşik û werdê bînan de xebitnena. Rewşa bîyaye de ganî ma menga tebaxe de wişk bikerdêne la emsar mi erey dest pêkerd. Ma hema qet tebera sebze nêgirewto. Hem vay o û hem zî organîk nîyo. Sebzeyê ma 15-20 rojan de wişk benê û dima ra ma wedarnenê. Ma bi bawerî xebitnenê. Ma sebzeyê xo yê wişk û baharatan zî viraznenê.”

	 

	‘Çi destê ma ra yeno ma viraznenê’

	 

	Hulya dîyar kerd ke ê wayîrê baxçeyêko pîl ê û baxçeyê înan sa, miro, xewxî estê û vat: “Ma fêkîyan zî wişk kenê û pê debara xo zî kenê. Ma kîloyê sayan bi 3 TL, yê miroyan bi 8 TL û yê xewxan bi 15 TL roşenê. Wexto ke ma arêdanê ma zehmetî ancenê. La seba krîzî çi destê ma ra yeno ma viraznenê û pê debara xo kenê.”