Dayîka Aştîye Şadîye bi xoverdayîş hemverê dej û tedayan vejîya 

2020-09-16 13:04:31


	 

	AMED - Endama Meclîsê Dayîkê Aştîye ya Amedî Şadîye Hayme, hemverê dej, teda û tepiştişan her wext rayîrê têkoşîn û xoverdayîşî weçîna. Şadîye vat: "Çira hende dayîkan ra tersenê? Çira hende hêrişê dayîkan kenê? Ma dayîkî qetî bi tepiştişan fek dewa xo ra vera nêdanê û nêeşkenê ma bitersnê.”

	 

	Şadîye Hayme, serra 2001 de pêwa xebatê Meclîsê Dayîkê Aştiyê bena. Hemverê cuya hende zor, zehmet, teda û şîdetî rayîrê têkoşînî weçîna. Têkoşînê Şadîye tena mîyanê xebatê Meclîsê Dayîkê Aştîye de wexto ke dewijî koçberî ci rê ame ferzkerdiş dest pê kerdo û heta roja ewro ameye. Tena seba domanê xo ney seba heme domanê ke serê na cografya de ciwîyenê, mîyanê tevgerî de bî. 

	 

	Şadîye serra 1958 de qezaya Farqînî ya Amedî de ameye dinya. Hema 15 serrî bî ameye zewicnayene. Dayîka 7 doman a. Bi domananê xo dir pîl bîya û ciwîyayîş musaya. Pêwa hende zehmetîyê cuye û hemverê teda û şîdetî dewlete dir zî rî bi rî menda. Farqînê Amedî de serra 90î de polîtîkayê şer yê taybet ameyîne kerdene. Dewî ameyî veşnaye, vengkerdene, koçberî ame ferzkerdene. Her roje însanî ameyîne kiştene. Şadîye her wext bîya şahidê nê hedîseyan. Şadîye nika Amed de ciwîyena.

	 

	‘Her roje eştêne serê keyeyî’

	 

	Şadîye derheqê cuya xo de wina vat: "Her roje eştêne serê keyeyê ma. Mêrdeyê mi teda dir rî bi rî mendêne. Dimayê ke domanê mi pîl bî, na rey zî kewtî dimayê domananê mi. Reyke hîrê domanê mi û mêrdeyê mi pîya tepiştî. La dima ra domanêk mi ame tepiştiş û nika tepişnaye yo. Lajê mi zî 17 serrî gerîlla bi, ame tepiştiş û hema zî zîndan de yo. Mi zaf derdê giranî antî. Kênayêka mi şehîd kewte. Mi zaf zor û zehmetî ant. Wexto ke hema qij bî, leşkeran domanêk mi 9 serre berdî serê wesayîtê akerde de girê dayî. O wext zimistan bi, vewre ameyîne heta verê çokan. Leşkeran cilê domanî ci ra vetî û bi viran heta qereqole berdî. Şarê dewe pêro şaş mendîbî. Domanê mi serdî ra nêeşkayîne qisey bikero.”

	 

	‘Çira hende dayîkan ra tersenê?’

	 

	Şadîye qiseykerdişê xo de bale ante serê goristanan û vat: “Çend rey hêrişê gorê kênaya mi kerdî. Nameyê ci kêlik ra berdî. Tehemûlê serdestan rengan rê zî nîno. Mi bi layê kesk, sûr û zer mundib û dabi serê gorê aye. Înan ameyîne la berdêne la mi reyna viraştêne. Dişminêke wina xidar o ke êdî xo zî vinî kerdo. Çira hende dayîkan ra tersenê? Çira hende hêrişê dayîkan kenê? Bi destbendkerdiş û tepiştişan wazenê ma bitersnê û xebatanê ma asteng bikerê. La gerek bizanê ke ma tena aştî wazenê.”

	 

	‘Ma fek dewaya xo ra vera nêdanê’

	 

	Şadîye dîyar kerd ke cuya înan bi destbendkerdiş û tepiştişan derbaz bîya û wina vat: "Her wext domanê ma ameyîne destbendkerdiş û tepiştiş û qetî rehetî nêdayî ma. Reya ewil ez serra 1998 de ameya destbendkerdene û ez 10 rojan tepişte menda. Cuya mi heta roja ewro wina bî. La ganî bêro zanayene ke ma qetî fek dewaya xo ra vera nêdanê. Ma do pey dewa û domananê xo de bê.”