Yildiz Ok Orak: Proseso normalbîyayîşî bi felaketê ma 

2020-09-15 13:12:41


	 

	Medya Uren

	 

	AMED - Derheqê zêdebîyayîşê vîrûsê koronayî de Hemsereka SESî Yildiz Ok Orake qisey kerd û vat: "Dayeyê ke Wezîrê Weşîye pare keno, rastîyê pandemî nêmojneno ra. Sîstemê weşîye xirabî ver şono ke wina dewam bikero ma do rastê felaketê pîlan bêrê."

	 

	Tirkîya ke bi krîzê ekonomî dir leqa, nika zî bi krîzê weşîye dir leqeno. Her roja ke derbaz bena, tabloyêk tehluke ê derheqê vîrusa koronayî (covîd-19) vejêno vernîya ma. Dimayê 1ê hezîrane de prosesê, "normalbîyayîş" ame destpêkerdene û hûmara nêweşan hîna zêde bî. Goreyê dayeyê sazgeh û dezgehê weşîye, dayeyê Wezaretê Weşîye rast nîyê. Hemsereka Sendîkaya Kedkarê Weşîye (SES) ê Amedî Yildiz Ok Orake derheqê rastîyê dayeyan û rewşa herême de fikrê xo ajansê ma rê pare kerd.

	 

	'Rojane bi hezaran kesî nêweş kewenê'

	 

	Yildize, dîyar kerd ke nika nêweşxane de ca nêmendo û wina vat: "Hûmara kesê ke nêweş benê zêde bîya. La dayeyê ke hetê wezîrê weşîye ra yenê parekerdene, rastî nêmojnenê ra. Xêrcê nê dayeyan, ma seke sendîkaya weşîye û endamê ci, rewşa bîyaye taqîb kenê. Dayeyê ke herême de resenê destê ma, ma kenê rapor. Seke Platformê Amedî, ma şaristananê bînan dir rewşa bîyaye pare kerd, înan zî ma rê eynî çî neql kerd. Dayeyê ke yenê dayene ra tewr zêde, welatî nêweş kewenê û mirenê. Xêrcê nê mabêne weşkerdoxan de zî problemê tewr pîl estê. 10 weşkerdoxan ra yew no şewbe kewto. Sîstemê weşîye ver bi xirabî şono. Eke wina şoro ma do rastê felaketê pîlan bêrê."

	 

	'Rapor de sebebê merdişê korona nîno nuştene'

	 

	Yildize, dîyar kerd ke xeylê kesî şewbe ra erdê û rapor de merdişê înan korona nîno nuştene û wina vat: "Bi nê rengî wazenê janê korono manîpule bikerê. Tena Amed de bi hezaran kesî sebebê merdişê înan bi nê rengî ameyo ramojnayene. Eke korona nîyo/a çira nêweşxaneyê pandemîyî de maneno/a? Babetêk bîn ke munaqeşeyê ci bîne; seba merdişan goristanê Yenî koyî de seba merdişan ca visnayê, la nika cayê ke biwazê nimnenê."

	 

	'Asayîşê yenê girewtene sewîyeya cir de ya'

	 

	Yildize, tewr peyîn wina vat: "Nika do bireso sewîyeya tewr cor. Mektebî yenê akerdene û bêguman ma do xeberê hîna xirab bieşnawê. Ganî no zî ma rê ecib nêro. Xora tedbîr ke yenê girewtene, sewîyeya tewr tayî de yê. Xeylê kesê ke şube kewtê, nêweşîya xo nimnenê û xebata xo dewam kneê. No zî ramojneno ke do cuya xeylê kesan bikewo binê tehluke. La waştişê ma akerdişê mekteban de yo. La seba ko no krîz hîna pîl nêbo, lazim o ke tedbîr bêrê girewtene."