'Ma wazenê seba cinîyan ekonomîyêka xoser awan bikerê' 

2020-09-15 12:31:40


	 

	Sara Şêx Hesen

	 

	HELEB - Cinîyê ke Terzîxaneyê Êlênî yê Komîteya Ekonomîye ya Kongreya Starî de xebityenê dîyar kerdî ke seba xoserîyê ekonomîye cinîyan, projeyê winasî girîng ê û vatî: "Bi projeyê wina ma wazenê cinî teberê keyeyî de bixebityê. Ma bi umîdê ke pêro cinîyê Helebijî mîyanê proje de ca bigîrê."

	 

	Komîteya Ekonomîye ya Kongreya Starî seba hetê ekonomî de hetkarî bidê cinîyan, her wext mîyanê tevgerî de yê. Seba ke cinî bibê wayîrê kar û mesleg, bi projeyê newe kewenê vernîya cinîyan. Projeyê Terzîxaneyê  Êlênî yew projeyêk deskewtişî cinîyan o. Pêro xebatkarî cinî yê û taxa Şêx Meqsûdî ya Helebî de ame akerdene. Derheqê babete de cinîyê ke terzîxane de xebityenê fikrê xo ma dir pare kerdî.

	 

	'Ma wazenê cinî vejîyê teberê keyeyî'

	 

	Îdarekara Komîteya Ekonomîye ya Cinîyan Fatme Hesene, serê amancê akerdişê projeyî de qisey kerde û vat: "No proje ke ma akerd,, ma waşt ke seba cinîyan gamêka newe bierzê. Terzîxane de tena cinî xebityenê û cinîyê xebatkarî zî bi no projeyî rê zaf kêfweşê. Zereyê terzîxane de sîstemêk esto û pêro cinî pîya hempar xebityenê. Ma her menge înan dir kombîyayîş viraznê, seba ke ma bi eşkê tewr zêde bi problemanê înan dir û zehmetîyê ke ancenê eleqedar bê û bibê hetkar. Bi kaerdişê projeyî dir ma wazenê cinî teberê keyeyî de bixebityê. Ma bi umîd ê ke do pêro cinî no proje de ca bigîrê."

	 

	'Cinî bi îradeyêk pîl kede dana'

	 

	Sozdar Mihemede derheqê terzîxane de wina vat: "Nê terzîxane de ma 12 cinî xebityenê.Ma her kes serê karêk de yê û ma kêmîyê yewbînan temam kenê. Çîyo tewr balkêş zî terzîxaneyê ma de pêro cinî yê û heta îdarekare ma zî cinî ya. Reya ewıl o ke zereyê taxa Şêx Meqsûdî de projeyêk winasî yeno kerdene. Ez wazena her cinîyêk hêzê zereyê xo de bivîno û kar bikero. Wa ekonomîye cinîyan xoser biba ke hewceyê kesî nêba. Dest, ling û aqilê ma esto, ma eşkenê xo îdare bikerê. Tu wext wa cinî bi çimêk qij xo ra nêewno. Cinî bi îradeyêk pîl kede dana."

	 

	'Ma pêro cinî bi yew ruhî xebate kenê'

	 

	Emîne Mihemede kêfweşîya xo bi xebate xo arde û wina vat: "Ma saetê serê sibayî de kar kenê. Ma pêro bi yew ruhî terzîxane de xebityenê. Roja ma ya ewro de tu ferq û cîyayî mabêne cinî û camêrdan de çin o. Karê ke camêrdî kenê, cinî zî eşkenê bikerê. Cinî bi tekoşînê xo eşkena astengîyan wedarno û beşdarê karî bibo."