Edîbe bi berardişê tutinî dir debara xo kena   

2020-09-12 15:27:34


	 

	AMED - Edîbe Eze, Farqînê Amedî de ciwîyena û seba debara keyeyê xo berardişê tutinî kena. Edîbe dîyar kerd ke 2 serrî yo nê karî kena û karêko zaf zehmet o.

	 

	Xeylê keyeyî bi berardişê tutinî dir debara keyeyê xo kenê. Farqînê Amedî de cinî bi karê tutinî dir eleqedar benê. Edîbe Eze ku 2 serrî yo karê tutinî kena û pê debara keyeyê xo kena.

	 

	Edîbe, qiseykerdişê xo de bale ant serê kar û barê xo û vat: "Ma zîyan de toximê tutinî erzenê û bende manenê ke heta şitlan bigîro. Dimayê ke şitlê ci pîl benê û sena arêdayîşî amade benê. Ma nê şitlê ke pîl bîyê tira kenê û benê hewşeyê keyehê xo û bi no hawa dest bi kar kenê. Nika ma nê pelê tutinî derbazê la kenê û dîrekan rê daliqnenê. Dima ra nê tutinê daliqnaye binê tîje de verdenê ke zer bibê. Wexto ke wişk bî, ma înan hewênenê û kenê zere. Wexto ke bi zimistan zî nê tutinî êdî nerm benê. Dimayê ke nerm bî ma înan kenê destik û heta çaxê rotişê înan yeno.”

	 

	Edîbe, dîyar kerd ke karêko zaf zehmet o û wina vat: “Nê katî de keda cinîyan zaf zêde ya. Ma debara xo bi nê karî kenê. Bi 2 serrî yo ez nê karî kena. Pel bi pel destê ma ra derbaz beno. Ma serê sibayî dest pêkenê heta şan de.”