Cinîyê Şirnexîjî: Cûdî kezebê ma yo 

2020-09-11 14:38:25


	 

	ŞIRNEX  - Cinîyê Şirnexijî, derheqê şewatê daristanê koyanê Cûdî, Gabar û herema Bestayî de reaksîyonê xo ardî ziwan. Cinîyan dîyar kerd ke wexto ke Cûdî veşêno kezeba înan zî ci dir veşêno û veng dayî selahîyetdaran ke çareserîyêk şewatî tê bêro vînayene.

	 

	Bi ameyîşê hamnanî dir xeylê şaristanê Kurdistanî de şewatê daristanan ame destpêkerdene û şewato ke vejêno peynîyê ci naênê. Cayê tewr zêde ke şewat vejêno zî Şirnex, Lîce, Colemêrgo ke xeylê rey daristanê înan herêman de şewat vejêno. Herême de binê nameyê asayîşî û seba caardişê operasyonan xeylê rey şewat hetê leşker û qorîcîyan ra bizanebîyayîş vetî. Tewr peyîn ke Şirnex de şewat vejîya û şewato ke 4 rojan de 7 cayê Koyê Cûdî de vejîyayo seba ke mudaxele ci rê nîno kerdene vila beno. Seba şewatî xeylê darî, baxçe û zîyanî veşayî. Hukmat ne verdeno ke welatîyê herême şewat bitefnê û ê zî nêtefnenê. Goreyê dayeyê ke ameyê girewtene, Koyê Cudî, Gabar û herema Bestayî de 40 ra zêdeyêr ware ameyê veşnayene. Cinîyê Şirnexî reaksîyon hemverê şewatê Koyê Cudî dyî û waştî ke şewat bêro tefnayene.

	 

	'Nê adirî bitefnê'

	 

	Cinîyê ke reaksîyon ramojnayî înan ra yew zî Derya Kabule, ard ziwan ke Koyê Cûdî înan rê teybet o û vat: "Cûdî seba bîyayîş, mirad û tarîx o. Wexto ke Cûdî veşeno kezeba ma zî veşêna. Cuya ma ê koyan dir girêdaye ya. Bi mengan o Koyê Cûdî veşêno. Dewijê tîya bi baxçeyan debara xo kenê. La heme rez û baxçeyê dewijan veşayî. Pêwa nê nêverdenê ke kes şêro bitefno. Ma veng danê selahîyetdaran ke şewat bitefnê."

	 

	'Bes o kezeba ma veşnenê'

	 

	Gûlîstan Kabula ke Koyê Cudî hemverê înan veşêno û seba astengîyê leşkeran nêeşkenê bitefnê, dîyar kerd ke bi zanabîyayîş koyê înan yenê veşnayene û wina vat: "Cûdî wayîrê tarîxê ke kan o. Cûdî bîyayîşê ma yê Kurdan o. Cûdî hemverê ma de keno hawar. La ma nêeşkenê çîyêk bikerê, ma yenê astengkerdene. Xeylê heywanî nê şewatî de veşayî. Çi heqê înan esto ke xoza û daristananê ma veşnenê. Hukmat cuya ma asteng keno. Ewro kesê ke Cûdî veşnenê, wazenê ke pêro kurdî ê dewan ra vejîyê. Ganî ma fek Cûdî û koyanê xo ra vera nêdê. Ma wayîrê koyanê xo vejîyê. Ma êdî nêwazenê ke zerrîya ma biveşo. Ma bêhuqûqî qebul nêkenê. Ma wazenê edalet bi ca bêro. Vengdayîşê ma hukmatî û walî rê esto, wa nê şewatî bitefnê. Bes o kezeba ma veşnenê."

	 

	'Cûdî seba ma kultur, tarîx, bîyayîş û mîras o'

	 

	Tewr peyîn cinîya bi nameyê Aysel Kabule zî dîyar kerd ke şewat bêehlaqî yo û wina vat: "Dewlete ewro bi zanabîyayîş, daristanê ma veşnena. Cûdî seba ma kultur, tarîx, bîyayîş û mîras o. Koyê Cûdî seba ma kurdan xeylêk girîng o. Seba nê zî dewlete ewro verê xo da ya uca veşnena. Cuya ma her wext serê koyê Cûdî de ya. Ma vanê ganî şewat bêro tefnayene. Senîn şewatê Hatay û Edene yeno tefnayene, ganî şewatê nê zî bêro tefnayene. Ewro no zîhnîyeto lêşin serê na cografya de xo dano teber û cîyayê kenê mabêne daristanan. Şewatê daristanê şaristanê tirkan yeno tefnayene, la ê tîya nîno tefnayene. Şewatê daristanê ma seba înan xem nîyê."