'Ne mektebî ne zî sîstem perwerde rê amade nîyê' 

2020-09-10 15:09:12


	 

	Melîke Aydin

	 

	 

	ÎZMÎR - Sekretera Cinîyan ê Şubeyê Hûmara 2yîn ê Egîtîm Senî ya Îzmîrî Zelîha Danyelîye derheqê mekteba sereyîn û sinife yewine ke do 21ê Êlule de derbasê perwerdeyê rî bi rî bê qisey kerde û va: "Hema zî tu tedbîr nêameyê girewtene. Sewbîna her ke şono wendekarî perwerde ra dûr kewenê."

	 

	Wezîrê Perwerdeyî Zîya Selçukî rojêk verê eşkerayî da û vat, do 21ê êlule de mektebê sereyîn û sinife yewine do dest bi perwerdeyê rî bi rî bikerê. Heto bîn ra zî sinifê bîn zî do dûr ra perwerdeyê xo dewam bikerê. Kedkarê perwerdeyî zî rexne kenê ke beşdarê munaqeşeyê derheqê prosesî de nînê kerdene. Sekretera Cinîyan ê Şubeyê Hûmara 2yîn ê Egîtîm Senî ya Îzmîrî Zelîha Danyelîye derheqê babete de ercnayîş kerde û dîyar kerd ke tu tedbîr nêameyê girewtene û her ke şono, domanî perwerde ra dûr kewenê.

	 

	'Bêtudîştî yeno nimtene'

	 

	Zelîha wina vat: "Goreyê eşkerayîya wezaretî mîlyonêk û nîm wendekarî xo nêresenê perwerde, goreyê zanayîşê Egîtîm Senî girewtê hûmara hîna zêde ya. Xeylê domanî keyeyê înan verdê tablet û kompîtur, televîzyon zî çin o. No zî bêtêduştî xo dir ano. Bingeyê perwerdeyî dûr ra nêameyo awankerdene. Wezaretî vat, seba wendekarê ke perwerde dûr ra gênê, setê kitabî yê 17 hebî yê amade kerdê. Esas de wazenê ke oyo ke bêtêduştî binimnê."

	 

	'Wezaretî tu tedbîr nêgirewto' 

	 

	Zelîha dîyar kerd ke mamosteyî 24ê tebaxe de erşawitî mekteban û vat: "Ma dî ke mektebî amade nîyê. Îdarekarê mekteban bi hewldayîşê xo dezenfektan girewtê. Tu tedbîrî nêameyê girewtene. Ma nê çî raya umumî dir pare kerd. Zîya Selçûkî ma bi awankerdişê zemînê îstîsmarî de sûcdar kerd. Sey Egîtîm Senî berpirsyarîyê ma estê. Ma do rastîyan bêguman pare bikerê. Hema hacetê pakitî seba mekteban nêameyê girewtene. Wezîfedarê pakitîye nêgirewtê. Sinifî kêm ê. Sinifî goreyê sewîyeya înan nêameyê plankerdebne. Ganî bi mamosteyan bêro pirrkerdene."

	 

	'Domanî perwerde ra dûr kewenê' 

	 

	Zelîha, tewr peyîn wina vat: "Domanî perwerde ra dûr kewenê. No zî karkerîyê domanan û zewaco emro qij de zêde keno. Ma do her wext seba perwerdeyê têduşt û ziwanê dayîke zî têkoşîn bikerê. Egîtîm Senî derheqê çareserkerdişê problemî de komxebatan kerd û yewin zî bi Odayê Tabîban dir kerd. Ganî mektebna de xebatkarêk weşîye bibo. Ganî mamosteyî dem bi dem testan bikerê. Ma do seba heqê perwerdeyî têkoşîn bikerê."