Şaredarîya AKPyî de seba cinîyan butçe çin a 

2020-09-10 14:11:19


	 

	MÊRDÎN - Hemverfeka Meclîsê Koma HDPyî Renas Aburşuye dîyar kerd ke şaredarîya AKPyî ya Artuklu ya Mêrdînî raporê faliyetê yê 2019-2020 ê amade kerdê de seba cinîyan butçe visnayê û vat: "Şaredarî vana ke butçeyê ma çin a. Beşêk pîl rast û rayîrê visnayî. Seba nê zî tu cîyayî mabêne şaredarî û qeyûmî de çin o."

	 

	Raporê 2019-2020 ê Şaredarîya Artuklu ya AKP ya Mêrdînî de vejîybi meydan ke butçeyê aîdê şaredarî, Mudûrîyê Emnîyet, fermandarîyê cendermeyan ê merkezî, Teşkîlatê îstîxbaratê Neteweyî (MÎT), kişla leşkerî û kulubeyê warê şaredarî û bankayê taybetî rê ameyê xerckerdene. Sewbîna rapor de sey rayîr ameyê viraştene û derheqê cinîyan de zî tu butçe nêame visnaye. Hemverfeka Koma Meclîsê Partîya Demokratîkî ya Şaran (HDP) ya şaredarîya Artuklu Renas Aburşu raporê falîyetê şaredarî ercna.

	 

	'Derheqê cinîyan de butçe zî xebate zî çin o'

	 

	Renase dîyar kerd ke şaredarî bi serrêk û nîm derheqê cinîyan de tu xebate nêkerdê û vat: "Serrêke û nîm ma endamîya meclîsî kenê. Heta nika ma nêdî ke şaredarî seba cinîyan butçe visnaya. Ma nê anê ziwan la vanê ke her wext seba rayîr û îmarî xerc kenê. Rayîrê ke yenê viraştiş zî bi amancê rantî yenê viraştene. Ma sey cinîyê HDPyî têkoşînê xo dewam kenê."

	 

	'Beşêk pîl seba rantî ameyo visnayene' 

	 

	Renase sewbîna dîyar kerd ke xebatê ke raporê faliyetî de ca gênê zî, ramojnenê ke şaredarî tena seba rantê butçeyî xebitnena û vat, pêwa ke kombîyayîşê meclîsî de anê ziwan zî tu encam nêgînê û wina vat: "Heta nika şaredarîya Artuklu de seba cinîyan tena MARMEK ame awankerdene. Ma nêzanê ke xebatê ci çi sewîye de yê. Ma dî ke butçeyo ke ameyo visnayene de seba cinîyan tu çîyêk nêameyo kerdene. Pêwa ke ma îtîraz kenê zî netîce nîno girewtene. Seba rant butçe yeno xerckerdene. Bi di serrî yo tu xebat seb cinîya çin o. Tu ferqê şaredarî yê wextê qeyûmî çin o."