Wan de 300 mektebî de testê pozîtîfî vejîyayî 

2020-09-07 14:47:52


	 

	WAN - Sekretera Cinîyan ê Platformê Şubeyê ê KESKî ya Wanî Funda Demîr Bozkurte, dîyar kerd ke 300 mektebî de testê pozîtîf vejîyayê û va, bêtêduştîyê perwerdeyî de no wextî de hna zaf ameyo vînayene.

	 

	Seranserê dinya de û Tirkîya de semedê vîrusî hûmara merdeyan her ke şina hîna zêde bena. Nêweşxaneyê pandemîyan de êdî ca nêmendo û şaristano ke hîna zaf vîrus vila bîyo Wan o. Pêwa hûmara zêde Wezîrê Perwerdeyî Ziya Selçuk dîyar kerd ke planê înan oyo ke perwerdeyê rî bi rî 21ê êlûle de bidê destpêkerdene. Zîya Selçûkî dîyar kerd ke mîlyonêk û nîm wendekarî nêeşkenê xo biresnê Torra Neqlkerdişê yê Perwerdeyê (EBA) û vat, bi pakêtê înternetî xoresnayîşê EBA asan nêbeno. Sekretera Cinîyan a Platformê Şubeyê Wanî ya Konfederasyona Sendîkayê Kedkarê Îstîmlakî (KESK) Funda Demîr Bozkurte derheqê babete de qisey kerd û vat, pêwa hûmarê zêde yê vîrusî akerdişê mekteban zî do tehluke zêde bikero.

	 

	'Pandemî de têduştî nêame kerdene'

	 

	Funda dîyar kerd ke prosesî de problemê perwerdeyî de hîna bîyê zêde û vat: "Bi taybetî zî têduştî yê perwerdeyî de bi pêroyî rawişt. Zanayîşê ke ma girewtî; xeylê domanê wayîrê materyalan nêbî. Xoresnayîşê  înternetî bi ca nêame. Kompîtur û tabletan ra bêpar bî. Nê prosesî de ganî dewlete têduştî bi ca bêardêne. Ganî hacet û materyal bêpere seba domanan biameyîne dayene. Pêwa nê domanê ke îmkanê înan qet çinîbî estbî. Domanê feqîran, domanê koçber û yê kêmîmkanî, ma dî ke nê domanan xo nêresnayî perwerdeyî."

	 

	'Ganî tedbîrê lazim bêrê girewtene û perwerde rî bi rî bêro kerdene'

	 

	Funda dewam de wina vat: "Perwerde dima ra goreyê amancê xo nêbi. Ganî wendekar ri bi rî perwerde bivînê. Eke tedbîrê lazimî bêrê girewtene, perwerdeyo rî bi rî eşkeno bêro kerdene. Semedo ke perwerdeyî dûrî de bêtêduştîyêk pîl vejêno meydan."

	 

	'300 mektebî de testê pozîtîfî'

	 

	Funda bale ant serê testê pozîtîf û wina vat: "Roja ke mektebî abîyê heta nika bi seyan mamoste bi vîrus kewtî. Nêzdîyê 300 mektebî de testê pozîtîfî vejîyayî. Goreyê cigêrayîşê ke ameyê kerdene de sinifan de tewr zêde 12 wendekarî bibê. Seba nê ganî problemê sey butçe, tayînkerdişê mamosteyan, xeylê problemê bînî werte ra wirzê. Ma butçeyêk têduşt wazenê la wezîrê ma vano, meaşê mamosteyan bi hawayêko cidî ‘kulfet o’. Ma kedkarê perwerdeyî vanê ke; meaşê ma kulfet nîyo. Ganî seba her mnektebî xebatkarê weşîye bibê, pakitî bibê. Ganî nê problemî bêrê çareserkerdene û mektebî eşkenê abibê."

	 

	'Mamosteyan dir kêmîyê motîvasyonî awan kerd'

	 

	Funda tewr peyîn wina vat: "Ganî mekteban anêkerê. Perwerdeyê dûrî zî seba wendekaran bêtêduştî awan kerd. Seba mamosteyan prosesêko zehmet bi. Motîvasyonê mamosteyan kewt. Nê prosesê pandemîyî de bi domanan dir problemê psîkolojîk û endîşe vejîya meydan. SES, mamosteyê rehber û şercnayîşê psîkolojîkî na babete de xebatan kerdî. Ganî nê hetê ke tesîr serê domanan de virazêno zî bêro vînayene."