Pêrodayîşan de lajê xo vindî kerd, bî hedef 

2020-09-06 09:31:15


	 

	DÊRSIM - Cinîya bi nameyê Fadîme Barana ke pêrodayîşêke de lajê xo Barano HPGyij vindî kerd, dimayê nê bî hedef. Fadîme hîrê rey ameye destbendkerdene û derheqê aye de 8 dewa ameyî akerdene. Fadîme hem hemverê tedayan têkoşîn kerd û hem zî hewl dana vîrardişê xo lajê xo dir bido ciwîyayîş.

	 

	Serrê peyînan de bi hêrişê hemverê gor û cenazeyê PKKyijan hewl danê ke keyeyan ceza bikerê. Keyeyê ke wayîrê este û gorê domananê xo vejênê zî hedef yenê girewtene. Înan ra yew zî hemşeradarîya Perî, Fadîme Çetînkaya ke dewa Sorekî ya Dêrsimî de ciwîyena û qeyûm tayînê ci ame kerdene.

	 

	Qeyûm tayînê vera ci bi, ameye destbendkerdene

	 

	Fadîme Çetînkaya ke hemşaredara Perî ya Mezgîrtî Dêrsimî bî, qeyûm tayînê vera ci ame kerdene û di roj dima zî eştî serê keyeyê aye û ameye destbendkerdene. hîrê rojî dimayê destbenkerdişî bi şertê ke do hewte ra hîrê rey îmza bierza, serbest ameye veradayene.

	 

	Dewijî hemverê hêrişê goristanî vejîyayî

	 

	Lajê Fadîme, Baran Çetînkayo HGPyij (Brusk Dersim) 4ê êlule 2015 de pêrodayîşê qerekole ya merkezê Dêrsimî de birîndar bibi û 6ê êlûle de dinyaya xo bedilna. Fatma, dimayê lajê xo rastê tedayan ameye û wina vat: "Dimayê serrêke, rojêke hêrişê gorê lajê mi kerdî. Ma sey dewijan hêrişî rê reaksîyon ramojna. Serê xoverdayîşî dir peyser xo antî. La gorê lajê mi texrîb kerdibî."

	 

	Şîîre bî sebebê hêrişê diyîn

	 

	dimayê hêrişê reya diyîn eştî serê keyeyê Fadîme û Fadîme wina vat: "Sebebê destbendkerdişî zî şîîre serê gorê lajê mi bi. Destbendkerdiş de şîîre mi ra pers kerdî. A şîîre lajê mi ra mendebî. Verê ke beşdarê PKK bibo, mi rê a şîîre verdabi. Seba nê zî dewa mi rê akerdî. Sewbîna reyke zî semedo ke mi serê gorê lajê xo de nameyê ci nuştib, ez ameya destbendkerdene. Vatî, ‘nameyê ci Baran o, to çira Birûsk nuşt o? Dewa mi rê akerdî."

	 

	'Ma qetî sere nêtewêna'

	 

	Fadîme, dewam de wina vat: "Ma heqdar ê. Ma çim nêdayo malê kesî, gorê kesî, esteyê kesî. Gelo heta ewro kam ci welatî de no ameyo ciwîyayîş? Kam ci welatî de esteyî gor ra ameyê vetene, bi kargoyî dir esteyî ameyî erşawitene. Sewbîna hemverê xoza û bawerîya Dêrsimî zî hêrişî zêde bîyê. Ma do qetî herra xo terk nêkerê."

	 

	Do 9ê teşrîna verêne de qerarê roniştişî bibo

	 

	Fadîmeya ke bi pêroyî 8 dewayê ci estê, pêro dosyayê aye kerdê yew. Qerarê roniştişî do 9ê teşrîna verêne de Yewin Dadgeha Cezaya Giran ya Tuncelî de bêro vînayene.