Aytena ke bi şîdetî dir rî bi rî manena nîna pawitene 2020-09-03 11:55:28   MÊRDÎN - Ayten Yilmaza verê bi desan rey bi şîdetê Serhat Çalgici reyde rî bi rî ameye, qerarê pawitişî derheqê aye de amebi dayene û wextê qerarê ci peynî bi. Aytene dîyar kerd ke Serhat Çalgiciyo ke ame destbendkerdene û serbest ame veradeyene, mesajê tehdîdî erşaweno û vat: “Semedê çareserîyêk mende semedê mi bêro vînayene, gelo gerek ez bimirî?”   Mêrdîn de Ayten Yilmaza ke verê xeylê rey bi şîdetê Serhat Çalgiciyî reyde rî bi rî ameye, 30ê Temmuze de Kuçeyê Kîlîse yê Qoserî de bi şîdetî dir rî bi rî mende û dimayê nê, qeraro ke mengêke bêra pawitene ame dayene. Serhat Çalgici, dimayê gerrekerdişî hîrê rojî dima ame destbendkerdene, bi şertê kontrolê edlî ame veradayene û nika zî tehdîdê kiştişî Aytene rê keno.   Aytena ke asayîş seba ci nîno girewtene, çareserîyêk mende wazena.   ‘Qerekole de vatî ‘reyna Serhat’’   Aytene seba şîdeto ke dîbi serê ci şikyabi û 6 kêlî dabî sereyê ci ro û verê zî eynî kesî 3 rey kuwabi. Aytene dîyar kerd ke her rey bi raporê derbkerdişî şîya qereqole la pêwa nê derheqê babete de tu çîyêk nêameyo kerdene. Aytene wina vat: “Reya ewil ke bi şîdetî dir rî bi rî menda, ez şîya qerekole û vatî, ‘reyna Serhat.’ Mi zî vat, ‘belê reyna Serhat.’ Verê mi bi desan rey gerre kerd la destbend nêkerdî. Gerrekerdişê peyîn de bi xêrê avûkatan mengêke qerarê pawitişî ame girewtene. Dimayê gerrekerdişê hîrê rojî dima îfadeyê ci ame girewtene û veradayene. Serdayîşê mi yê verê de tedbîr biameyîne girewtene, nika do 6 kêlî serê mi nêkewtêne.”   ‘Mesajê tehdîdî erşawenê’   Aytene ard ziwan ke hema zî yena tehdîtkerdene û coka telefonê xo vurnayo û wina vat: “Kêsê derûdorê mi de yê zî înan tehdîd keno. Asayîşê mi çin o. Însanan ra vano, eke şima ci dir qisey bikerê û bêrê têhet ez o şima bikşî. Her roje mesajê tehdîdan gêna. Seba ke no kes bêro destbendkerdene, yan zî qerarê pawitişê derheqê ey de bêro dayene gelo gerek ez bimirî? Gelo dimayê merdişê mi do çîyêk bikerê. Pêameyîşê Stenbolî esas ame girewtene û qerar ame girewtene. Gelo dimayê merdişê mi do çîyêk bikerê.”