‘Semedê ma 6 mengî emrêk o...’ 

2020-09-01 13:08:12


	 

	ENQERE - Gazel Buluta ke zîndanê Tîpê F yê Hûmara 1î ê Kandirayî de tepişte ya, 6 mengî yo domana xo nêvînena. Gazele vat: “Şima bizanê 6 mengî seba ma çend emr keno! Ganî pêvînayîşê akerdeyî bêrê kerdene.”

	 

	Cinîya bi nameyê Gazel Buluta Dêrsimije rojnamegerîya Ozgur Gelecekî de muxabirî kerdêne, eşkerayîyê ke beşdar bibî sebeb ame ramojnayîş û 2013 de ameye tepiştene. 11 mengan tepişte mende û dima ra ameye veradayene. Dima ra bi îdiayê endamîya rêxistine û propagandayê rêxistine kerda 10 serrî û 10 mengî ceza ci rê ameye birnayene û dosya aye şî 16in Daîreyê Cezaya Giran ya Dadgerî.

	 

	Gazele kênaya aye bi nameyê Çîgdem Arjîne esta û 31ê Temmuza 2017 de ameye tepiştene û erşawitî zîndanê Tîpê E yê Muglayî. Dimayê ke erşawitî zîndanê Gebze û tewr peyîn zî erşawitî Kandira. Gazele bi mengan o kênaya xo ya 4 serrî nêvînena.

	 

	‘Proses derbaz nêbeno’ 

	 

	Gazele dîyar kerd ke pandemî de bi hawayêk giran tesîr serê zîndanan de kerdo û vat: “Bi sebebê korona heqê ma yenê xespkerdene. Şîyayîşê nêweşxaneyan, pêvînayîş, spor, sohbet û xeylê heqê bîn ameyê wedaritene. No proses zî bi hawayêk nîno wedaritene. Teber de park, baxçe û otel her çî serbest o, labelê ma mîyanê tecrîdî de yenê tecrîdkerdene.

	 

	‘Rewşa dayîkan giran a’

	 

	Gazele mektubo ke erşawitib de dîyar kerd ke dayîkê hepsî bi mengan o domananê xo nêvînenê û wina vat: “Semedê sînorkerdişî ma domananê xo nêvînenê. Ma domananê xo yê mabêne 0-6 serrî de nêeşkenê bigîrê verê xo. Wezareta dadî eşkerayî dano ke çîyêk zîndan de çin o. La çi heyf, ma nê eşkerayî de û pratîk de nêvînenê. Bi 6 mengî yo kênaya xo nêvînena. Şima zanê ke 6 mengî çend emrî yo. Her akerdişê telefonî de wazena bêro verê mi. Hezîrane de pêvînayîşê akerdeyî ameyî destpêkerdene la menge ra reyke ame sînorkerdene. Çi heyf, reyna kênaya xo nêvîna. Kênaya mi kabînê padayan ra tersena. Ez vengdayîşê hîsgêrî kena. Bi kilmî ez wazena vajî ke wa dayîkê hepsî domananê xo bivînê.”