‘Bi engiştanê linganê xo ez ewnîyayîşê xo yo dinya xêz kena’ 2020-08-31 14:26:36       Sorgul Şêxo    HESEKÊ - Nîgarkêşa bi nameyê Dûa El-Bestatî ke bi bîyayîşê xo ra bê dest a, bi îrade û waştişêko pîl, resimê ke fehm û ewnîyayîşê xo ya ciwîyayîşî ci de vînena xêz kena. Dûa vana: "Xêzkerdişê resiman de semedo ke ez bê dest a, vera destî engiştê linganê xo xebitnena. Bêmucadele merdim nêreseno amancê xo.”   Cayê zerrîweşî ke merdim awankerdox bo, hêvîyê xo mîyanê ciwîyayîşî de girs bikero, bineqşo û renganê keskûsûre bivîno. La tewr weş oyo ke merdim bi rewşa bîyaye û nêweşîyê xo dir mucadele bikero û xeyalanê xo bi ca bîyaro. Nîgarkêşa cinî Dûa El-Bestatî ke yew cinîya ke bi mucadele xo ver dana, dimayê xeyalanê xo şî û tu astengî nas nêkena. Dûa derheqê cuya ma rê qalî kerd.   ‘Mi bi xêzkerdişê resimê domanan dest pêkerd’   Dûa vat ke do îradeyê ci astengdarî derbaz bikero û wina vat: “Gama ke ez ameya dinya û heta nika mi xo dîyo nêdîyo ez bê dest a, le reyna zî ez vatişê ‘astengdar a’ qet qebûl nêkena. Semedo ke mi astengî nas nêkerd û sey merdimê saxleman têgeyraya. 12 serrî ya xo ra ez resimê domanan xêz kena, la bi demî dir û bi paştdayîşê wakile û heskerdoxanê xo mi waşt ke ez bêresa xeyelanê xo û înan bi ca bîyatî û ez bi ser zî kewta.”   ‘Amancê mi oyo ke ez sewîyeya dinya de nîgarkêşî bikera’   Dûa wazena sewîyeya dinya de nîgarkêşî bikera û wina vat: "Bi hezkerdiş û îradeyî, mi xeylê astengî hemverê xo derbaz kerdî. Wexto ke mi unîversîta de Fakulteya Hunerê Xaseke wendêne, bi berardişê xo ez beşdarê xeylê projeyanê Ukrayna, Birîtaniya û Urdunî bîya. Sewbîna ez beşdarê xeylê pêşengeh û festîvalê ke Sûrîye de ameyî organîzekerdene bîya. Înan ra yew pêşangeh zî Heleb de Merkezê Hunerî yê Dar El-Opêra bi. Ez o hîna zêde xo aver berî ke sewîyeya dinya de nîgarkêşî bikerî û mesajê xo biresnî her kesî.”   ‘Cinî û nîgarkêşî nêzdîyê yewbînan ê’   Dûa dîyar kerd je cinî û nîgarkêşî yew ruh ê û wina vat: "Xoza, nîgarkêşî, hunermendî û dengbêjî pêro rengê cinîyan ê. Cinî çinbê manaya ciwîyayîşî çin a. Cinî û nîgarkêşî yewbînan temam kenê. Cinî wayîrê hîsê cîya yê û hîsanê xo û mesajê xo bi rayîrê xêzkerdişî mesaj danê.”   ‘Bê mucadele çîyêk bi ca nîno’   Dûa tewr peyîn girîngîyê mucadeleyê kesan ê ciwîyayîşî de ard ziwan û wina qedêna: “Cinî eşkena pêro sînoran derbaz bikera, hewn û xeyalanê xo bi ca bîyara. Ganî cinî hemverê adetê komelî zî mucadele bikera. Bê mucadele çîyêk nêşino sere.”