‘Qerarê tahlîye do vernîyê sucanê newe abikero’

2020-08-30 15:15:55


	 

	MÊRDÎN - Endamê Platformê Cinîyan ê Şahmaranî yê Mêrdînî reaksîyon hemverê tahlîyekerdişê gumanbarê tecawizî, çawîşê pispor Mûsa Orhanî dayî û dîyar kerdî ke do tahlîye do vernîyê sûcê neweyan abikero û vatî, Musa Orhan ganî bêro tepiştene.

	 

	Cinîya bi nameyê Îpek Ere Sêrt de bi tecawizî dir rî bi rî mende, 16ê temmuze de qezaya Beşîrî ya Êlihî de hewl da întîxar bika û 18ê temmuze de nêweşxaneyê ke mendêne dinyaya xo bedilna. Derheqê merdişê Îpeke de bi sûcê "istîsmarê cinsî" dewa ameye akerdene û netîceyê reaksîyonî de 19ê tebaxe de çawîşo pispor Mûsa Orhan ame tepiştene, la dima ra serbest ame veradayene. Endamê Platformê Cinîyan ê Şahmaranî yê Mêrdînî hemverê qerarî de reaksîyon ramojnayî.

	 

	Melîke Bîsîkletçîlere dîyar kerd ke verê zî bi desan rey bi nimûneyî bêcezaverdayîşî dir ameyî rî bi rî û wina vat: “Demê peyîn de tê dima întîxarê cinîyan û şîdetê serê cinîyan yeno meydan. Ganî gumanbarî lezabez bêrê tepiştene û edalet bi ca bêro. Bi taybet Mêrdîn û şaristanê derûdorî de ma vînenê ke serbaz û çawîşên pispor mîyanê gumanbaran de yê. No zî polîtîkayê şer û şîdetî yê dewlete dir eleqedar o. No bêcezabîyayîş merdim nêeşkeno qebul bikero. Mucadeleyê ma do hemverê nê dewam bikero.”

	 

	Renas Abuşuye zî dîyar kerd ke şîdetê serê cinîyan demê AKPyî de resayo sewîyeya tewr berz û wina vat: “Tena 18 serrî de bi destê dewlete 18 hezar cinî ameyî qetilkerdene. Îqtîdaro ke hewl dano, cinîyan bikero binê bindestîyê xo ganî bizanê ke her kiştişê cinîyêke polîtîk o. Ma cinî ma do hemverê polîtîkayê bêcezabîyayîşê de mucadele bikerê. Ganî Pêameyîşê Stenbolî bi ca bîyarê.”