‘Ez o hemverê zulm û tedayan pey dewaya xo de bî’ 

2020-08-30 14:44:36


	 

	AMED - Melek Yamana ke serra 90 de bi teda û zordarî reyde rî bi rî mende û vat: "Dewa ma ameye veşnayene, ma koçber bî û lajê mi hemverê tedayan verê xo da ko û şehîd kewt. Cuya mi her wext bi mucadele derbaz û heta ke dilopêke gonî canê ma de bibo, ma do xo ver bidê.”

	 

	Serê na cografya de bi hezaran hîkayeyê bi dej û xoverdayîşî estê. Wexto ke domanê nê welatî seba azadî û edaletî tercihêk kenê, pey xo de hîkayeyêk verdenê. Dayîkê înan zî wayîrê nê hîkayeyan vejênê. Farqînê Amedî de serrê 1990 û 1994 de kerdişê hizbûllahan xeylê zêde bi û bi netîceyê hêrişan de bi seyan welatî na qeza de ameyî kiştene. Xeylê dewê Farqînî ameyî veşnayene û vengkerdene. Koçberî bi înan ameye ferzkerdene. Înan ra yew zî keyeyê Melek Yaman (60) bi.

	 

	Serrê 90 de dewa Meleke ameye veşnayene û Meleke zî bi domananê xo dir verê xo da Farqîn. Meleke dayîka 11 domanan a. Meleke sey bi hezaran dayîkê bînan mîyanê şert û mercê şerî de domananê pîl kerda. Lajê Meleke, Hesenî 8 serrî verê , hemverê tedayan verê xo dayo mîyanê tevgerê azadî û 3 serrî verê pêrodayîşik de cuya xo vindî kerdo.

	 

	Koçberê Farqînî bî

	 

	Meleke derheqê cuya xo de wina vat: "No bi 30 serrî ma ameyî Farqîn. Wexto ke ma dewe de bî ma debara xo bi ramitişî titûnî kerdêne û pê domananê xo wey kerdêne. Serrê 90 da rewşa ma vurya û êdî hemverê ma de zulm û heqaret dest pêkerd. Dejê ke ma o wext antî, nînê serê ziwanî. Êdî hêriş û tedayê dewlete dest pêkerdî. Tewr peyîn dewa ma ameye veşnayene. Mal û mulkê ma ame veşnayene û xeylê kesî ameyî kiştene. Koçberî ma rê ferzkerdî û mecburî ma dewe û warê xo terk kerd û ma koçberê Farqînî bî.”

	 

	‘Qetî zulm û tedayan ra xelas nêbî’

	 

	Keyeyê Meleke wexto ke ameyî qeza bi tedayan dir rî bi rî mendî, xeylê rey domanê ci ameyî destbendkerdene û tepiştene. Meleke wina vat: “8 serrî verê lajê mi Hesen verê xo da ko. Mi hîs û fehmê xo her wext bi kilaman ardêne ziwan. Semedo ke xêrcê deyîran mi nêeşkayîne derdê û hîsê xo ardêne ziwan. 3 serrî verê şajê mi Hesen şehid ket. Lajê mi hemverê teda û şîdetî verê xo da bi ko.”

	 

	‘Ez o pey dewaya xo bî’

	 

	Dimayê ke Hesenî dinyaya xo bedilna, Meleke tewr zêde bi klaman derd û kulê xo ard ziwan. Meleke wina vat: "Ez her wext vana, heta dilopêk gonî canê mi de bibo ez o xo ver bidî. Ez o her wext pey dewaya xo bî. Ma ne ê Sûrî, ne Cîzîr û ne zî kurdê ke 7 serre û heta 70 serreyê ke ameyê kiştene xo vîr ra kenê.”