‘Ma dî wa domanê ma nêvînê’ 

2020-08-30 13:38:57


	 

	Şehrîban Abî

	 

	WAN - Altun Şîmşeka ke emro qij de ameye zewicnaye û rastê şîdetê sîstematîkî ameye û wina vat: “Êdî cinî vengê xo berz kenê. Ma ciwîyayî, wa domanê ma nêciwîyê. Destûr medê zewacê emrê domanî de, destûr medê şîdet.”

	 

	Seba ferzkerdişê rolê cinsî yê komelî û zîhnîyetê serdest yê camêrdan ê bi nameyê ‘zewacî’ de domanî rastê îstîsmarî yenê û eynî wextî de zî bi şîdetê sîstematîkî dir yenê rî bi rî. Altun Şîmşeka 75 serrî û emrê qij de bi berdêlî zewicyaya, bi serran bi şîdetî reyde rî bi rî menda. Altune dîyar kena ke çîyê ke aye ciwîyaya, wa cinîyê bîn nêciwîyê û vat, semedê zewicnayîşê domanan destûr nêro dayene.

	 

	Altune dewa Albayrakî qezaya Elbaqî Wanî de ciwîyena, Altune dîyar kena ke emro qij de barê giran serê milê ci de ameyo barkerdene û wina vat: “Semedê keyeyê ma, ma doman nêbî. Ma bi her tewir zehmetî dir ameyî rî bi rî. Semedo ke domanê ma zî nê çî nêciwîyê, ma ganî mucadele bikerê.”

	 

	‘Her roje mi sey cehenem derbaz bi’

	 

	Altune dîyar kerd ke bi çimanê keyeyê ci, ê rew bîyê pîl û vat, ê hetêk ra karê keyeyî de ameyîne pelçiqnayîş û serê nê de zî ameyîne zewicnayene. Altune bale ante serê şîdeto ke dimayê zewacî her tim ameya rî bi rî û wina vat: “Ez ê rojan qet xo vîr ra nêkena. Mi tena xo ra vatêne ‘gelo çira’. Pêwa ke ez domanêka qij bîya zî her roje serê lingan de bîya, her roje mi sey cehenemî bi.”

	 

	‘Ma nêeşkayîne veng vejê’

	 

	Altune dîyar kerd ke çîyê ke cuyaya keyeyê aye zî tede, kesî dir pare nêkerdo û vat: “Nê emrî de zî ez xo resnena her karî. Bedenê mi aciz bîyo. Eke hişê min o nika bibayîne, seba ke nêzewicîyê mi her çî kerdêne. La o wext şert û mercê ma çinbî. Mêrdeyêk seba dewamkerdişê ciwîyayîşê cinî qetî hewce nêkeno. Şertêko ke ganî her kes bizewîcîyo çin o. Cinî bi tena sereyê xo hîna kêfweş ê. Cinî êdî vengê xo berz kenê. Heqê xo geyrenê. Gerek ma destûr nêdê zewacê domanan.”