Tîyatroyê Şaristanê Amedî projeyêko newe dayo destpêkerdene

2020-08-27 14:29:00


	 

	AMED - Tîyatroyê Şaristanê Amedî bi projeyêko newe temaşekerdoxanê xo pêşwazî keno. Projeyê skêçan ê seba bernameyê televîzonî ame amadekerdene de demêko nêzdî de her hewte do beşêk bêro serê ekranê televîzyonî.

	 

	Şubeyê virûsê koronayî (Covîd-19) bi pêroyî tesîrê xo serê temamê komelî de kerd û tewr zêde zî serê wareyê tîyatro dî tesîrê xo kerd. Bi nameyê tedbîrê Korona de heme salonê tîyatroyî û cayê ke kesî kom benê ameyî qedexekerdene. Nê ra kaykerdoxî êdî kay nêkerdî. Tîyayroyê Şaristanê Amedî seba nê sebeban, demêko derg mabêne da kar û xebatê xo yê wareyan. Tîyatro xo amade keno ke bernameyêk skêçan serê ekranê televîzyonan bido weşankerdene. No ser o kaykerdoxan  şîroveyê xo ardî ziwan.

	 

	‘Her hewte do beşêk bêro weşankerdene’

	 

	Endama Tîyatroyê Şaristanê Amedî û kaykerdox Zeycan Ateşe dîyar kerd ke seba projeyê newe bi kelecan ê û wina vat: “Senîn ke prosesê pandemî ame destpêkerdene, qerarê padayîşê tîyatroyan zî ame dayene. Coka ma nêvejîyayî sehne. Reyan zî ma serê medyaya komelî de berardişê xo pare kerd. Sewbîna ma serê youtube de qanalê Tîyatroyê şaristanê Amedî de kayê xo pare kerdî. Nika projeyê ma yê bernameyê televîzyonî esto. Ma seba nê provayan kenê. Her hewte do beşêk bêro parekerdene. Ma bi kelecan ê. Hem seba ke bi hîrê, çar mengî yo ma nînê têhet, hem zî seba projeyê ma yê newe heyecanê ma zêde yo.”

	 

	‘Her kes eşkeno skêçan binuso’ 

	 

	Endama Tîyatroyê Şaristanê Amedî û kaykerdoxe Şahperî  Alphane zî wina vat: “Rewşa pandemî seyke serê her kesî de tesîr kerd, serê ma de zî tesîr kerd. Gama ke prosesê normalbîyayîş destpêkerd, ma zî viraştişê projeyan dest pêkerd. Nika bernameyê ma yê skêçan esto. Skêç bi xeylê xo bi koman yenê dewamkerdene. Skêçê ma tena hetê nuştoxan ra nînê nusnayene. Her kes eşkeno binuso. Bernameyêko ma ni nameyê 'Henekhenek' esto. Kesê ke biwazê eşkenê skêçanê xo bierşawê adres. Hema tarîxê pêşkêşkerdişê proje dîyar nîyo. La ma do demêko nêzdî de dîyar bikerê. Sewbîna zî nika xebata kayêke ma bi nameyê ‘Elîzabeth’ esta la hema dîyar nîya do key pêşkişkerdene. Ma do sezonê bêro de bi na kaye ma do temaşekerdoxan pêşwazî bikerê.”

	 

	‘Tîyatro bê temaşevanan nêbeno’

	 

	Endama Tîyatro yê Amedî Sîdar Aslane zî ard ziwan ke tîyatro bê temaşevan nêbeno û vat: “Seba prosesê pandemî ma rew ra yo nêvejîyabî sehne. Pêwa prosesê pandemî ma bi endîşe yê ke xo senîn biresnê temaşevanan. Seba nê ma waşt ke ma bi rayîrê televîzyon û Medyaya komelî xo biresnê kaykerdoxan. No zî seba ma û seba temaşekerdpxan gamêka bi mana ya. Temaşevanê ma zî eşkenê skêçanê xo binusê û beşdarê xebatanê ma bibê.”