'Krîzê ekonomî tesîr serê ma de zî kerd' 

2020-08-24 14:43:23


	 

	AMED - Rozerîn Ozçelîke dîyar kerd ke krîzê ekonomî, tesîrêko pîl serê esnafan de kerdo û vat, bi dayîka xo dir Sûr de dikan akerdê û wina vat: "Pêwa heme zor û zehmetîyan ma hewl danê ke mucadeleyê xo dewam bikerê."

	 

	Tirkîya de her ke şino krîzê ekonomî zêde beno û tewr esnafî ci ra tesîr benê. Xeylê esnafî mecbûr mendî ke kargehê xo padê. Dayeyê hukmatî yê derheqê ekonomî de zî rastî nêmojnayî ra û reaksîyonê şarî vera nê her ke şino zêde benê. Rozerîn Ozçelîke krîzê ekonomî ra tesîr bîya, Sûrê Amedî de dikanê ci esto û hewl dana ke debara xo bikera. Rozerîne bi dayîka xo dir dikan xebitnena û dîyar kerd ke ameyê sewîyeya padayîşî û vatî ke yewin çimey debara înan esnafî ya.

	 

	'Ma netîceyê mucadeleyêko pîl de dikan akerd'

	 

	Rozerîne dîyar kerd ke bi serran o eynî karî kenê û wina vat: "Ma sey cinî mucadeleyêko pîl da. Bi 18 serrî nê karî kena. Verê zî dayîka mi tena dikan xebitnabi. Ez û waya xo ma pîl bî û ma hetkarî da. Nika ez û dayîka xo ewnîyenê. Akerdişê dikanî zî mucadeleyêko pîl bi."

	 

	'Mabêne mi û dayîka mi paştdayîşêko pîl esto' 

	 

	Rozerîne dîyar kerd ke xêrê dikanî rê debara xo kenê û wina vat: "Mabêne min û dayîka mi de paştdayîşêko pîl esto. Paştdayîş ma pîl kerd. Reyan girewtişê hacetan de ma zehmetîyan ancenê. Ma rojane 16 saetî akerde yê. No zî ma dano zehmetî. La ma kêfweş ê."

	 

	Rozerîne tewr peyîn wina vat: "Pîyê mi çend serrî yo nêxebityeno. Ma xêrê nê dikanî debara xo kenê. Pandemî de ma zehmetîyê pîlî antî. Semedê qerarê qedexeyî ma nêeşkayîne dikan abikerê. Ma eşyan nêgirewtêne. O proses zaf zehmet bi."