Gulîstane çi rê şahîdî kerda? 

2020-08-23 14:39:43


	 

	MERKEZÊ XEBERAN - Waya Gulîstan Dokuya ke 231 rojî yo ci ra zanayîş nîno girewtene Aygul Dokuye dîyar kerd ke gumanbar Zaynal Abakarovî şewa ke Gulîstane vindî bîya mesaj erşawito û vato, “O mendib ke heme planê dayîka mi sûcê to ra xira bîne, keye de zaf çîyêk xirab ame meydan” û persê gelo Gulîstane bîya şahidê çi? kerd.

	 

	Gulîstan Dokuya ke wendekara Unîversîteya Munzurî bî 5ê Çele de vindî ya 232 rojî yo tu zanayîş nîno girewtene. Cigêrayîşê Gola Uzunçayirî ke tewr peyîn Gulîstan Dokuye ser de amebî vînayene, 18ê Tebaxe de ame peynîkerdene.

	 

	Waya Gulîstane,Aygul Dokuye ke serê hesabê xo yê medyaya komelî de derheqê cigêrayîşê Gulîstane de qisey kerd û vat, pêwa delîlan ke Zaynal Abakarov gûmanbaro sereyîn o zî çira nîno tepiştene û muhakemekerdene.

	 

	‘Heme kesêk cewabê persê ma nêdayo’

	 

	Aygule bale ante serê mesajo tewr peyîn ê mabêne waya xo û Zaynal Abakarovî de û vat, "Ewro roja 231ê çinbîyayîşê Gulstane yo. Gulîstane 5ê Çelî de saete 00:30 de mesajo, 'ez tersena' Zaynal Abakarovî rê şirawena. O zî Gulîstane ra vano, 'Heta ke ti nê nêkerê, mi dir qisey meke.’ Gelo Gulîstane do çi bikerdêne? Tu kesî cewabê nê, nêda ma. Yan zî a şewe se bî ke Zaynal Abakarovî, Gulîstane rê mesajê, ‘o mendib ke heme planê dayîka mi sûcê to ra serûbin bîne û keye de zaf çîyêk xirab bi.’ A şewe se bi? Gelo Gulîstane çi rê şahidî kerd. Nê mesajî pêro qeydkerde yê. Merdimê zanistî vînenê ke Zaynal Abrakovî Gulîstane tehdît kerdo û xo peyser anto. La hema zî Zaynal Abkarov nîno muhakemekerdene.”

	 

	Gelo do Gulîstane hawa ra bêro warî?

	 

	Aygule dewam de wina vat: “Beno ke ê Zaynal Abakrovî sûcdar nêvînê. Ma kiştox nêgeyrenê û ma kênaya xo geyrenê. Wa derheqê kênaya ma de zanayîşêk bidê ma. Ma vanê ke wa Zaynal bêro muhakemekerdene, her kes vano destê ma de delîl çin o. Gelo do Gulîstane hawa de bêro war?”