‘Hemverê vîrusî zîndanan de tedbîr nînê girewtene’ 2020-08-21 14:58:46   AMED - Bi vilabîyayîşê vîrusê koronayî dir ters û endîşeyê hepsîyan vejîya sewîyeya tewr berz. Sultan Degîşe semedê mêrde û kênaya xo tepişte vengdayîşê hîsgêrî kerd û vat, zîndanan de tedbîrê esasî nînê girewtene.    Tehlukeyê vîrusê koronayî (Covid-19) temamê dinya de dewam keno. Bi wedaritişê tedbîran vîrus tewr zêde vila bi. Nika selahîyetdarê dewletan reyna îqazkerdişê xopawitişî kenê. Yew zî nînan ra Tirkîyaya. 1ê hezarane de prosesê normalbîyayîşî ame destpêkerdene û heme tedbîr roj bi roje ameyî wedaritene. Sereyê ewilî de heta ewro semedê zîndanan tu tedbîrê hewce nêameyî girewtene û bi vîrûsî dir rîbirî ameyî verdayîş. Rewşa zîndanan her wext bî endîşeyê keyeyan.   Nîmet Degiş 29 serrî yo tepişte û nêweş o. Kênaya Nîmetî, Ferîhe Degişe zî tepişteya û nêweşîye aye kronîk estê. Nîmet û Ferîhe bi rayîrê telefonî derheqê rewşa zîndanî de zanayîş dayî keyeyê xo û vatî vera vîrusî tedbîrê esasî nînê girewtene. Sultan Degîşe derheqê kênaya xo Ferîhe û mêrdeyê xo Nîmetî de zanayîş da ajansê ma.   Keyeyêkê ra 3 hepsî...   3 mengî verê lajê Sultane serbest ameyo veradayene û nika zî keyeyî de 2 kesî hepsî yê û Sultane wina vat: “Mêrdeyê mi 29 serrî yo hepsî yo û xeylê rey ameyo sirgunkerdene û nika zî Zîndanê Tukoglu yê Mereşî de yo. Kênaya mi zî 2 serrî verê ameye tepiştene û nika Zîndanê Cinîyan ê Amedî de ya. Lajê mi Azad zî 8 mengî Zîndanê Amedî de mend û 3 mengî verê nika serbest ame veradayene.”   ‘Odayê karantîna pak nîyê’   Sultane qiseykerdişê xo de bale ante serê rewşa Nîmet û Ferîhe û wina vat: "Nêweşîyê kronîk ê kênaya mi estê û gere bêra tedawîkerdene. Semedo ke 14 rojan binê karantîna de manenê, kênaya mi nêşina nêweşxane. Vanê odaya karantîna pak nîyê û cayê pak nînê dayene. Semedê nê kênaya mi nêşina  nêweşxane.”   ‘Çîyê ke kantîn de yenê rotene vayê’   Sultane wina dewam kerd: "Çend rey cil û belg nîmete rê şawit la bi sebebê ke kantîn de estê, cil û belgan nêdanê ci. Labelê çîyê ke kantîn de zî yenê rotene zaf vayê. Pereyê ke ma erşawenê zî qîmê înan nêkeno. Ma hem zere de û hem zî teber de mexdûr benê. Dimayê prosesê pandemî ez di rey şîya serdayîşê kênaya xo. La seba îmkanê ekonomî çin ê, ez nêeşkena şêrî pêvînayîşê mêrdeyê xo.”   ‘Ez rewşa kêna û mêrdeyê xo ser o endîşeyîn a’   Sultane bale ante serê prosesê pandemî û wina vat: "Hepsî prosesê pandemî de Girtî di pêvajoya pandemiyê de bi problemê xidaran dir rîbirî mendî. Zîndanan de vilabîyayîşê vîrusî rîskêko pîl o. Şert û mercê xirab yê koguşan zî tesîrêko negatîf serê hepsîyan de keno, Ez rewşa kêna xo û mêrdeyê xo bi endîşeyîn a. Bi Qanûnê Înfazî dir hêrişkar, dizd û çete ameyî tehliyekerdene la hepsîyê sîyasî nêameyî veradayene. Embaz û hetgiranê xo serbest veradayî. Ê ma zî mîyanê 4 dêsan de mendî.”