‘Tepiştişê çawişo pisporî qîm nêkeno ganî cezaya giran bêra dayene’ 2020-08-20 15:02:48   AMED / ÊLIH - Aktîvîstê TJAyî dîyar kerdî ke tepiştişê çawîşo pispor Musa Orhanî qîm nêkeno, ganî cezaya tewr giran bêra dayene: "Hêzê dewlete yê leşkerî serê cinîyanê kurdan de polîtîkayêko taybet kenê. Semedo ke hêrişkar û tecawizkar nînê cezakerdene, hêrişê xof ê hemverê cinîyanê kurdan dewam kenê. Ganî cinî vera nê fehmî bêveng nêmanê.”   Qezaya Qubînî ya Êlihî 16ê temmuze de vejîya meydan ke Îpek E. (18) hewl daya întîxar bikera û dimayê ke bi birîndarî berdî nêweşxane, ame eşkerakerdene ke hetê çawîşo pispor Musa Orhanî ra bi tecawizî dir rîbirî menda. Îpek E. ya ke nêweşxane de ameyne dermankerdene rehmet kerde. Dimayê merdişê Îpeke serê medyaya komelî reaksîyonê pîl ameyî ramojnayene û tecawizkar Musa Orhan ame tepiştene. Derheqê babete de cinîyan şîrove kerd.   ‘Edalet serê medyaya komelî de geyrenê’   Aktîvîsta TJAyî Berîtan Onene dîyar kerd ke bi nê polîtîkayan wazenê têkoşînê cinîyan biqedênê û vat: “Kurdîstan de polîtîkayê bi nê hawa newe nîyê. Bi taybetî zî nê polîtîkayî bi destê dewlete ra hemverê cinîyan yenê kerdene. Wazenê nasname û rûmetê şarê Kurdî bikerê binê lingan. Kurdistan de heme polîtîka bi zanebîyayîş yenê kerdene û bingeyê ci zî vindîkerdişê kurdan esto. Eke reaksîyonê xurt nêameyîne ramojnayîş, tecawizkar nêameyîne tepiştiş. Seba ke êdî şar edalet serê medyaya komelî de geyreno. Hedîseya Îpeke zî bi no hewa bî.”   ‘Helwestê dewlete polîtîk o’   Aktîvîsta TJAyî Têkoşîn Tekîne zî dîyar kerd ke bêceza verdayîşê hedîse, tecawiz hîna zêde keno û vat: “Gama ke tecawizkar nêro pawitene, na yena na mana ke dewlete şîdet û tecawîz tesdîq kena û mojneno ra ke helwestê dewlete, helwestêko polîtîk o. Hêzê dewletê yê leşkerî serê cinîyanê kurdan de polîtîkayêko taybet kena. Batman de Îpeke zî hetê çawişo pisporî ra bi tecawizî dir rîbirî mende û rehmet kerde. Vatişê tecawizkarî Musa Orhanî, 'Çîyêk bi mi nêbeno’ nê helwestî bi zelalî eşkera keno û mesajêko pîl dano. Ganî cinîyê kurdî nê polîtîkayê taybetan rê baldar bê û hemverê nê vejîyê. Ma zî sey TJA her ware de hemverê nê polîtîkayê lêşinan bêveng nêmanê û bi têkoşînêk xurt cewab bidê.”   ‘Nêeşkenê îradeyê cinîyê Kurdan bişiknê’   Aktîvîsta TJAyî Fatma Ablaye zî nê hedîseyî tesaduf nîyê û vat: “Ma zanê ke hedîse bi fehmêk bi ca yenê. Vatişê tecawizkar Musa Orhanî zî hêzê xo çara gêno ramojneno. Yan zî vano, ‘paşta mi de dewlete esta’ ganî wina bêro vînayene. Ma do taqîbkerdoxê na dewa bibê. Nêeşkenê îradeyê şarê kurdî bişiknê.”   ‘Ma do xo ver bidê’   Welatîyê Êlihî ra Ayten Yildirime zî ard ziwan ke sey pêro cinîyan hedîseya Îpeke ra xeylê tesîr bîya û vat: “Ma nêwazenê çîyê wina bêrê meydan. Ganî înan ra êdî vajê, 'bes' o. Kesê ke nê çîyan rê bêveng manenê senîn wijdanê înan rehet maneno. Bi nê çîyan wazenê çimê ma bitersnê, la ma do xo ver bidê.”