Rojawan de 14 kesî bînî bi vîrus kewtî 

2020-08-18 15:48:46


	 

	QAMIŞLO - Heyetê Weşîye yê Bakur û Rojawanê Sûrîye da zanayene ke 14 kesî bîn zî bi Vîrusê Koronayî kewtê. Pêropîya 219 kesî bi janê Korona kewtî.

	 

	Hemserekê Komîteya Weşîye ya Rojawanî Cîwan Mustefayî da pêhesneyene ke herêma înan de 14 kesê bîn zî bi Vîrusê Koronayî kewtê û sewbîna 2 kesî zî rewşa înan baş bîya. Kesê ke bi vîrus kewtê wina yê: 8 kesî Qamişlo, 3 Dêrik, 2 Amûdê û Kobanê de zî kesêk/e.

	 

	Ciwanî dîyar kerd ke hûmara kesê ke vîrus kewtê resaya 219 kesî, înan ra 14 kesî cuya xo vindî kerdê. 

	 

	Ganî bêro vîrvistene ke Rayîrberîya Xosere tewrê qerarê qedexeyî de da zanayene ke ganî tîya ra pê pêroyê hemwelatijî bi maskeyan bivejîyî teber. Rayîrberîya Xosere cayanê sey bazar, sazî û pêroyê cayanê girseyî de bê maskeyan vecîyayîşê teberî qedexe kerde. Kesê ke nê qeraran binpay bikerî do bêrî cezakerdene.