Esnafê Wanijî: Gelo ma çira ekonomîya ke perana nêvînenê? 

2020-08-17 13:47:47


	 

	WAN - Esnafê Wanijî, hemverê vatişê, “ekonomîya ma perana” reaksîyon ramojnayî û vatî: "Kesê ke peranê, wayîrê sermayedar ê, esnaf bi xetereyê krîzî dir rî bi rî manenê.”

	 

	Tugba Yazgana ke Bazarê Rûsî de xebityena, dîyar kerd ke pandemî dir tewr zêde krîzê ekonomî kûr bi û vat: “Ma zaf nêeşkenê çîyêko biroşê. Sewbîna kesêk zî êdî nîno bazar zî. Ma kêm xebityenê. Seb welatîyan cayêko zaf maqûl o seba dayîşûgirewtişî. La ez bi nêzîdîyê 6 mengî yo tîya xebityena labelê welatîyê Wanî êdî nînê bazar zî. Bi berzbîyayîşê vayîya dolarî ma nêeşkenê çîyêk zî dikanê xo rê bigîrê. Ma hem nêeşkenê çîyan biroşê û hem zî nêeşkenê fatureyê dikanî bidê.”

	 

	‘Dayîşûgirewtiş kêm bîyo!’ 

	 

	Bedîa Elîşe pasaj de deştiş kena wina vat: "Serekdewlet Recep Tayyîp Erdoganî vano, 'ekonomîya ma perana.’ Gelo pera ma çira nêvînenê. Ekonomîya mi vera ke bipero, kewta bin. Yê ke peranê zî sermayedar ê. Nika esnafêk zî nêeşkeno bixebityo. Peynîya hewteyî de pêro dikanî girewte yê. Labelê mîyanê hewteyî de zî muşterî çin ê. Ma paştdayîş dayo, kredîyê ke seba domanan dayîne, parçe parçe danê. Ez TOKÎ de nişnena ro û dikana mi zî kîra ya. Menge de 2 hezar TL ez seba keye xerç kena. Karê mêrdeyê mi zî çin o. Her kes zî zano ke ma tîya bi dolaran çîyê xo gênê û wexto ke wina bo çîyêk destê ma ra nîno.”

	 

	‘Semedê krîzî esanf tehluke de yo’

	 

	Murat Çacur zî 15 serrî yo esnafî keno û wina vat: "Bi kûrbîyayîşê krîzî dir esnaf zî kewto mîyanê tehluke. 15 serrî yo maxazeya mi cil û belgan esta. Labelê seba krîzî ez o maxezaya xo devr bikerî. Wexto ke vayîya dolarî berz bena, ma zî çîyê xo yê maxaze bi vayîya newe roşenê. No zî beno sebebê reaksîyonê muşteriyan. Muşterî zî heqdar ê, semedo ke pereyê înan çin o. Seba ke ma deynê xo bidê ma zî debara keyeyî kêm kenê.”

	 

	‘Heta nîmeyê aşmî çîyêko destê ma de nêmaneno’ 

	 

	Remziye Elyîgîte zî seba 2 domananê xo maxazeya cil û belgan de bî aye zî wina vat: “Ma keye de 4 kes ê. Wexto ke ma vejênê sûke, ma deyndar geyrenê. Keye de tena mêrdeyê mi xebityeno. Kîrayê keyeyî, mesrefê doman û mutbexî û ûsn. Heta nîmeyê menge çîyêk destê ma de nêmaneno. Ez nika seba domananê xo çîyan bigîra labelê her çî zaf vay o û ez nêeşkena bigîrî.”