‘Sîstemê tecrîdî serê hepsîyê ke karantînayî de yê yeno ferzkerdene’ 2020-08-16 15:18:38   AMED - Avûkata TUAYDERî Aslihan Bulute ard ziwan ke îhlalkerdişê heqî zîndanan de dewam keno û vat: “Nika problemê ke estê açernayê îşkence. Semedo ke pêvînayîşî yenê goşdarîkerdene, hepsî nêeşkenê tedayê ke înan rê yenê kerdene bîyarê ziwan. Sîstemê tecrîdî serê hepsîyê ke karantîna de yê yeno ferzkerdene.”   Semedê vîrusê Koronayî îhlalkerdişê heqan ê zîndanan zî her ke şino tewr zêde bo. Her roje zîndanî bi îhlalkerdişê newe yê hewan yenê rojeve. Hepsîyê nêweşî nînê tedawîkerdene û binê tedayan de yê. Hepsîyê ke testê înan ê vîrusê Koronayî pozîtîf vejêno û tedbîr nîno girewtene.   Avûkata TUAYDERyî Aslihan Bulutî derheqê îhlalkerdişê heqê merdiman yê zîndanan de ercnayîş kerd.   ‘Heqê înan yê bingeyîn destê înan ra yeno girewtene’   Aslihane wina vat: “Problemê zîndanan açeryayo îşkence. Wexto ke hepsî şinê nêweşxane dimayê 14 rojî binê karantîna de manenê, labelê hucreyê yewkesî de yenê verdayene. Tena roje de saetêke vejênê û hawa gênê. Kitaban nêeşkenê bigîrê û nêeşkenê bi telefon qisey bikerê.”   ‘Binê nameyê tedbîrî de xeylê îhlalkerdişê heqan yenê kerdene’   Aslihane ard vîr ke 2yîn Zîndanê Asayîşê Berzî yê Xarpêtî de hepsîyan derb werdo û wina vat: “Zîndanê Xarpêtî de hewcryê hepsîyan ê vilan nîno bi ca. Cigêrayîşê koguşan pêwa tehlukeyê vîrusî dewam keno. Binê nameyêtedbîrî de xeylê îhlalkerdişê heqan yenê kerdene.”   ‘Semedê hepsîyê sîyasî yê nînê tehlîyekerdene’   Aslihane wina vat: “Xeylê hepsî pêwa raporê înan ke nêeşkenê zîndan de bimanê, semedê hepsîyê sîyasî yê nînê tehlîyekerdene. Ma seba îhlalkerdişê heqan muracatê CPTyî da û ma sey pêşnîyazname da meclîs. Ma hewl danê ke wina rojeve de verdê. Sewbîna qiseykerdişê pêvînayîşê hepsîyan zî hetê îdareyê zîndanî ra yenê goşdarkerdene.”   ‘Zîndanî averşîyayîşê domanan asteng keno’   Aslihane wina vat: “Zîndanê Cinîyanê Amedî de odayêke de 3 domanî manenê. Yew înan ra zî Omedya ya û hema des aşmî bî dayîka xo ye Eylem Oyunlu dir kewte zîndan. Domananê bînan ra zî 2 yew zî 5 û nîm serre yê. Wexto ke dayîkî şêrê nêweşxane, ganî bi domananê xo dir 14 rojî binê karantîna de bimanê. Zîndanî hem warê averşîyayîşî û hem zî warê psîkolojîk de tesîrêko negatîf domanan keno. Zîndanî averşîyahîşê domanan asteng keno.”   ‘Karantîna açernayîşê tecrîdî yo’   Aslihane tewr peyîn wina vat: “Hepsîyê newe binê karantîna de manenê, tu lazimîyê înan bi ca nînê. Hepsî erd de werd wenê. Hepsî bi metodê tecrîdî yenê verdayîş. Karantîna açernayê tecrîd.”