Esnafê cinî semedê krîzî dikanê xo padanê 

2020-08-14 11:05:45


	 

	MÊRDÎN - Krîzê ekonomî, bi prosesê vîrusê koronayî dir tewr zêde kûr bi. Cinîyê ke esnafî kenê semedê krîzê ekonomî gerreyox ê û vatî: “Ma êdî nêeşkenê hewcedarîyê xo bigîrê. Ma nêwazenê azadîya ekonomîya ma destê ma ra şêro. Ganî semedê esnafê cinîyan bi taybetî hetkarî bêro dayene.”

	 

	Prosesê pandemî de tewr zêde esnafî mexdûr bî û bi taybetî zî esnafê cinî. Krîzê ekonomî ke vernîya pandemî de estbi, bi pandemîyî dir tewr zêde kûr bi. Xeylê esnafê cinî mecbûr mendî ke dikanê xo padê. Cinîyê ke esnafî dewam kenê zî mîyanê zor û zehmetîyan de ciwîyenê. Ozden Damare qezaya Qoserê Mêrdînî de esnafî kena. Ozdene dîyar kerd ke seba ke cinî azadîya ekonomîye xo vindî nêkerê, hemverê krîzî gamêke bêro eştene.

	 

	Ozdene 3 serrî yo sektorê teknolojî de xebityena û Ozdene zî sey bi hezaran esnafan prosesê pandemî de bi zehmetîyê xidarî dir rî bi rî menda. Ozdene wina vat: "Bi taybetî nê prosesî de cinî, domanî û kesê ke emrê înan derg o bi tesîr bî. Wexto ke ma nika herême ra ewnîyenê, esnafê cinî kêm bîyê. Nê wextî de xeylê esnafê cinî dikanê xo padayî. Semedo ke deyn estbi û êdî nêeşkayîne kîraya dikananê xo bidê.”

	 

	Ozdene wina vat: "Ganî tewr zêde seba esnafê cinî paştdayîş bêro dayene. Wextê mexdûrîyetî de ganî sere de cinî bêrê fikrnayîş. Ez debara keyeyê xo kena. Ez wazena seba îstîhdamî cinîyan rê wareyê newe bêrê akerdene. Her kes zî zano ke cinî tewr zêde eşkenê ekonomîya keyeyê xo eleqedar bê. Coka wexto ke cinî wareyê karî de bo, hîna baş beno. Ma nêwazenê dikanê xo padê nê prosesî de. 3 serrî peynî de ma mîyanê krîzê ekonomî de nîyê û no zî tesîr serê ma de keno.”

	 

	Wayîrê kargehî Gulistan Çoşkune zî va ke nêeşkaya kîraya dikanê xo bida û vat: "Semedê vîrusî, hûmara muşterîyan xeylê kêm bî. Nê prosesî de azadîya ekonomîya ma cinîyan şî. Ma nika nêeşkenê hewcedarîyê xo bigîrê. Seba nê zî ganî tewr zêde seba cinîyan paştdayîş bêro dayene. Eke rewşa ekonomîye wina bo, ma do verê xo bidê keye.”