
Dayîka Dîdema ke rojeyê mergî de ya: Bêvengî tesdîqkerdişê mergî yo  

2020-08-13 15:08:15


	&nbsp;

	ÎZMÎR - Dîdem Akmana ke hemverê zêdebîyayîşê teda û tecrîdê zîndanan, seba ke şertê cuyayîşê însanî dest bi rojeyê mergî kerdebî. Dayîka Dîdeme, Zulfîye Akmane wina vat: “Ha to pê çek kişt, ha ti bêveng menda. Bêvengî tesdîqkerdişê mergî yo.”

	&nbsp;

	18ê Sibate de Dîdem Akman û Ozgur Karakaya Zîndanê Girewte yê Şakranî de qezaya Aliaga ya Îzmîrî de bi waştişê muhakemeyê adîlane û başkerdişê şertê zîndanî, dest bi rojeyê mergî kerdebî. Rojeyê mergî yê Dîdem û Ozgurî dewam keno. Dayîka Dîdeme, Zulfîye Akmane dîyar kerd ke Dîdeme xeylê kîlo daya û lingê aye bîyê birîn. Sewbîna semedo ke nêeşkena sereyê xo bişo porê xo tira kerda. Zulfîye dîyar kerd ke waştişê înan seba refakatê Dîdeme ameyo redkerdene. Zulfîye dîyar kerd ke ganî seba avûkat Ebru Timtik, Aytaç Unsal, Ozgur Karakaya û Dîdeme kesêk bêveng nêmano.

	&nbsp;

	‘Ma qey wexto ke ma wenê ma ciwîyenê?’

	&nbsp;

	Zulfîye wina vat: “Ez 2yê Adare de şîya pêvînayîş û mi Dîdeme ra vat, ‘ma qey ti wazena mi gane bikerê mezel?'. Dîdeme zî vat, 'dayê ma qey wexto ke ma wenê ma ciwîyenê? Ti vînena ma çi vînenê. 45 deqeyan zî ma rê kenê sey jehr.’ Cayê înan de sohbetê embazî çin o. Cezayê pêvînayîş û têkilî danê. Yew qedêno, dima ra yewo bîn dest pêkeno. Hewadarkerdiş tena saetêke yo. Ma xeylê rey waştişname erşawit ke saetê zêde bikerê. Mi bi mudur dir pêvînayîş kerd. Ey zî vat, zaf qelebalix o û qîm nêkeno.”

	&nbsp;

	‘Kesê ke bêveng ê, ê zî merdiş ra berpirsîyar ê’

	&nbsp;

	Zulfîye wina vat: "Mustafa Koçak, Hêlîn Bolek, Îbrahîm Gokçek seba bêvengîye cuya xo vindî kerdî. Domanê ma seba ke şertê înan bêrê başkerdene û muhakemeyêko adîlane dest bi rojeyê mergî kenê. Nika Ebrû, Aytaç, Ozgur û Dîdeme rojeyê mergî de yê. Mebê kiştoxê nê çar ciwanan. Ez veng dana rexistinê komelî yê sîvîl, hunermend û Wezaretê Dade. Vengê domananê ma bieşnawê. Zerrîya dayîkan wa tewr zêde nêveşo.”

	&nbsp;

	‘Helwestê kêfî yê zîndanan rapor de ca nêgîno’

	&nbsp;

	Zulfîye dîyar kerd ke sazgehê ke raporê zîndanan amade kenê, tena sey tabloyêko baş bibo ramojnenê û wina dewam kerd: “24 saetan de tena saetêke seba boygirewtişê hewa, hepsîyan vejenê. Lêşinîyê hucreyan cor ra herikêno. Xanima Mudure vana ke prosedur wina yo. Zîndanê Kiriklar, Îzmîrî de saetêke pêvînayîş esto, tîya 45 deqe. Qanûnanê xo zî bi ca nîyanê.”

	&nbsp;

	‘Ez muxatab nêvînena’

	&nbsp;

	Zulfîye dewam de wina vat: “Kêna mi her aşmî waştişname seba îdarekarîyê zîndanî erşawit. Her ke mi waştêne pêvînayîş bi ca bîyarî, mudure xanim çinbî. Ez mûxatap nêvînena. Dozgerê Alîaga cewab dano o zî vano ke rewşa zîndanan wina yo. Wexto ke mi roja sêşeme kênaya xo dî, ez nêeşkaya rakoyî. 5ê Tebaxe de mi seba kêna xo refakatkar waşt la nêame qebulkerdene.”

	&nbsp;

	‘Polîsî çira sey dişmin têgeyrenê?’

	&nbsp;

	Zulfîye wina vat: “Ez semedo ke vengê kênaya xo bieşnawî, ma sey 6 kesan Îzmîr, Stenbol, Bursa şî Enqere û verê Wezaretê Dade û 100 polîsî mudaxaleyî ma kerdî. Mi bi kelepçeyê verpay ceza kerdî. 2 şewî û 2 rojî mi kerdî nezaret. Mi vat, ez terorist nîya, ez dayîkêka 70 serrî ya. Ma edalet wazenê. Serê tîşortê ma de 'Wa Ebrû, Aytaç, Ozgur û Dîdem biciwîyê’ amebi nusnayîş. Çekê ma no bi. Polîs çira sey dişminan tê geyrenê? Mektubanê kênaya mi nêerşawenê. Hepsîyan mîyanê qefesan de benê doktor. Hepsî vanê ma nêkewenê qafesan û nînê tedawîkerdene. Hepsî seba tedawî bibê kewtî rojeyê mergî.”

	&nbsp;