Hamnanî serê erdan de yê, zimistanî mekteban de yê 

2020-08-10 15:46:52


	 

	Fîlîz Zeyrek

	 

	EDENE - Emîne û Gulçîne êyê ke Edene de serê erdan de xebityenê, dîyar kenê ke hamnanî serê erdan de zimistanî zî mektebe de derbaz kenê. Wayê yewbînan Gulçîn û Emîne Şene êyê ke semedê wendişî Edene de binê germî de serê erdan de xebityenê, semedê înan vayîbîyayîşê şîyeyê perwerdeyî yê.

	 

	'Ma mecbûr ê biwanê'

	 

	Gulçîne dîyar kerd ke aye wazena biba mîmare û coka mecbûr a bixebitîya û vat: "Şîyayeyê unîversîta zêde yê. Semedê nê ganî ma bixebityê. Ez bi serran o semedê wendişî wina xebityena. Ma do dewam zî bikerê. Ma her roje yenê tîya bamya kom kenê. Ma serê sibayî rew wirzenê û heta êre ma xebityenê. Ma roje de 60-70 kîlo kom kenê. Tozê bamîyan keweno çimanê ma. Coka ma her wext nêweş kewenê. Ez 18 serrî ya û 13 serrî ya xora xebityena."

	 

	'Tirkîya zaf zehmet a'

	 

	Emîne zî sey waya xo semedê wendişî xebityena û vat: “Ez wazena Tip biwanî. Coka ez bixebityî. Verê pêro çî gerek perwerde bêpere bo. Labekê omid çin o. Tirkîya de her çî zaf zehmet o. Ma 10 wayê û bira yê. 4 hebî zewicyayê. Ez seba şîyayeyê mekteba xo xebityena. Ma serê sibayî saete 4ine de wirzenê. Ma wexto ke şinê keye, keye pak kenê û firaqan şonê."

	 

	Dayika înan Sevîne zî serê erdî de xebityena. Sevîme wina vat: "Ma kîloyê ci bi 7 lîra roşenê, şîyayeyê ma bi zor vejêno. La ma seba debara xo mecbûr ê bixebityê. Ma Çêrmûkê Amedî ra koçê tîya kerd. Îmkan bibayîne ez o biageyrêne welatê xo."