Hemserekê tepişteyî bi mengan o pabeyê îdianame yê 

2020-08-10 13:53:55


	 

	MÊRDÎN - Hemsereka DBPyî ya Mêrdînî Hasîbe Mengîrkaon û hemsereka HDPyî ya Mêrdînî Perîhan Agaoglu ke tepişte yê bi mengan o îdianameyê înan nêameyo amadekerdene. Hasîbe Mengîrkaona 56 serrî ke 9 mengî tepişte ya, problemê weşîye yê giran ciwîyenê.

	 

	Hemsereka Partîya Herêma Demokratîkî (DBP) ya Mêrdînî Hasîbe Mengîrkoan (56) û hemsereka Partîya Demokratîkî ya Şaran (HDP) ya Mêrdînî Perîhan Agaoglu Mêrdînî demê cîya de bi sebebê îfadeyê şahidê nimte ameyî girewtene û pêwa hende dem derbaz bi, îdianameyê înan hema nêameyo amadekerdene. Hasîbe ke nêweşa kronîkî ya û heta nika 3 rey, wedaritê nêweşxane û rewşa aye cidî yo. Sewbîna Perîhan Agaogluye zî Mêrdîn ra surgunê Zîndanê Tîpê T yê Rihayî ameye kerdene.

	 

	9 mengî yo pabeyê îdianameyî ya

	 

	Hasîba ke 24ê kanûna 2019 de semedê îfade bido şî emînîyet, ameye destbendkerdene û bi îdiayê endamîyê rêxistine ameye tepiştene. Xebatê KCDyî û îfadeyê şahidê nimte, sebeb ame ramojnayîş û ameye tepiştene. Hasîbe nêweşa astim, şekir û tansiyonî ya. Heta nika hîrê rey zîndan de xo de şî û aye neqlê nêweşxane kerdî. Prosesê pandemî de zî dermananê xo nêeşkeya bigîro û goreyê avûkatê aye hema îdianame sewîyeya cigêrayîşî de yo.

	 

	Mêrdeyê Hasîbe, Alî Mengîrkaon da zanayîş ke rewşa cinîya aye her ke şino xirab beno û vat: "Prosesê vîrusî de nêeşkayîne şêro nêweşxane zî. 9 mengî yo tepişte ya, hema îdianame nêameyo amadekerdene. Gelo cinîya 56 serrî karê aye zîndan de esto?"

	 

	Perîhan Agaogluye zî 20ê sibata 2020 de ameye destbendkerdene û aye zî bi îfadeyê şahidê nimte bi sebebê endamîya rêxistine 6ê adare de ameye tepiştene. 5 mengî yo îdianameyê aye zî nêameyo amadekerdene û surgunê zîndanê Tîpê T yê Rihayî ameye kerdene. Avûkatê aye Erdal Kuzu da zanayîş ke îdianame bi sebebê kêmîyê dosyaye de nîno amadekerdene.