‘Ma do zîhnîyetê tecawizkarî ra vajê êdî bes o’ 

2020-08-08 14:53:24


	 

	Fîlîz Zeyrek

	 

	EDENE - Endama Meclîsê Cinîyê Ciwanî ya HDPyî yê Edeneyî Suna Îzole derheqê hedîseyê tacîz û tecawizî ke herême de zêde bîyê de qisey kerd û vat, ê veng danê cinîyan ke vejîyê wareyan.

	 

	Reaksîyonê hemverê zêdebîyayîşê hedîseyê îstîsmar û tecawizî yê hetê pisporê çawîşan ra herême de yenê meydan dewam kenê. Endama Meclîsê Cinîyê Ciwanan ê Partîya Demokratîkî ya Şaran (HDP) ya Edeneyî Suna Îzole derheqê babete de şîrove kerd û polîtîkayê taciz û tecawizî ercna.

	 

	Suna, dîyar kerd ke hedîseyê tacîz û tecawizî yê herême hedîseyê munferît nîyê, verpayê ci bi sîstematîk bi ca yenê û vat: “Ma zanê ke çawişê pisporî û yê ke şibyenê înan, hedef kenê ke biresê amancê xo. Cinî û domanê kurdî hedef yenê girewtene. Nê kemînê wina nîşan danê ke wayîrê zîhnîyetêko çend lêşin ê. Ganî yê ke hemverê şarê ma cinî û domanan nê kenê bêrê tepiştene û muhakemekerdene. Seba nê zî çi destê ma ra bêro ma do bikerê.”

	 

	Suna tewr peyîn wina vat: “Ma sey Meclîsê Cinîyê Ciwanî yê HDPyî veng danê pêro cinîyan ke nê zîhnîyetî ra vajê êdî bes o. Wa cinî êdî bêveng nêmanê. Ma cinî kole nîyê. Wa vejîyê wareyan. Ma bi ciwan dest pêkerd, ma do bi ciwanî serkewte bê û ma do qezenc bikerê.”