‘Bi tedbîrê pawitişî ma eşkenê cuya xo dewam bikerê’ 

2020-08-08 13:44:01


	 

	Rojda Seyidxan

	 

	QAMIŞLO - Cinîyê bajarê Dêrikî yê Kantonê Qamişloyî derheqê vejîyayîşê vîrusê Koronayî yê herême de vatî ke ganî şar xo vîrus ra bipawo û wina vatî: “Ma bi omidê ke heme kesî na rewşe cidî bivînê. Qerarê Îdarekarîyê Xoserî seba pawitişê şarî yo, bi tedbîrê pawitişî dir ma eşkenê cuye dewam bikerî.”   

	 

	Vîrusê Koronayî ke welatê Çînî de dest pêkerd, dinya de pêroyî vila bi. Bi hezaran kesî bi sebebê vîrusî cuya xo vindî kerd. Demê peyîn de vîrusê Koronayî Herêma Vakur û Rojhelatê Sûrîye de vejîya û heta nika 50 kesî bi vîrus kewtê. Semedê pawitişê şarî Îdarekarîyê Xoser tedbîr û qerarê girîng seba herême girewt. Derheqê babete de cinîyê bajarê Dêrikî şîrove kerdî û ma dir pare kerdî.

	 

	‘Wa şarê ma rewşa vîrusî bi rengêko cidî bigîro dest’ 

	 

	Cinîya bi nameyê Samîya El-Berho serê vilabîyayîşê vîrusê Koranayî de wina vat: “Roj bi roje hûmara kesê ke bi vîrusê Koronayî kewenê zêde beno. Coka ma sey welatîyê bajarê Dêrikî heta destê ma ra yeno ma xo vîrus ra pawenê. No vîrus zaf bi tehluke yo, labelê heta nika xeylê merdimî na rewşa tehluke bi rengêko cidî nêgînê dest. Vengdayîşê mi pêro komelî rê oyo ke wa baş tedabîrê xo yê pawitişî bigîrê. Qerarê Îdarekarîyê Xoser seba pawitişê şarî, ma zî a gore têbigeyrê.”

	 

	‘Bi tedbîrê pawitişê dir ma eşkenê cuya xo dewam bikerê’

	 

	Cinîya bi nameyê Selamet Hacî zî derheqê pawitişî de wina vat: “Merdimê herême bi karê xo yê rojana dir eşkenê pawitişê xo vera vîrusî bikerê. Eke merdimî ferqê tehlukeyê ci de bo, do zirar kêm bo. Ma nêeşkenê keyeyê xo de her wext bimanê, la no nîno manaya ke ma pawitişê xo nêkerê. Bi tedbîrê pawitişê dir ma eşkenê cuya xo dewam bikerê.”