Cuya waya mi tehluke de ya’ 

2020-08-07 15:45:39


	 

	AMED - Cinîya 39 serrî S.P ke hetê camêrdo ke ey dir zewicnayîbî bi kardî ameye birîndarkerdene. S.P xeylê rey muracatê qereqole kerda la seba tirkî nêzanaya, nêeşkaya derdê xo vaja. Birayê S.Pye dîyar kerd ke hêrişkar bi zanayîş nîno tepiştiş û vat: "Bawerîya ma edalet rê nêmendo û cuya waya mi tehluke de ya.”

	 

	2yê tebaxe de Dîcle Kentê qezaya Peyasê Amedî de cinîya 39 serrî S.P hetê camêrdo ke ey dir zewicnayîbî bi darbeyê kardî bi giranî ameye birîndarkerdene. S.Pya ke bi giranî birîndar bî wedarnayî Nêweşxaneyê Unîversîta Dîcleyî. Dimayê hedîse hêrişkar Zulkuf P. wazeno cayê hedîse ra biremo la hetê zamayê xo Huseyîn Balta ra yeno astengkerdene. La Zulkuf Huseyînî zî bi darbeyê kardan bîrindar kerd.

	 

	‘S.P. tirkî nêzana’

	 

	Hasan Tanganî derheqê babete de wina vat: "Xeylê rey şîya qereqole la seba ke tirkî nêzanayîne, nêeşkayîne derdê xo vaja. Çîyê ke ameyo sereyê waya mi, nêameyo sereyê tu kesî. Her roje hetê mêrdeyê xo û keyeyê mêrdeyê xo ra rastê şîdetî ameyîne. Birayê Zulkufî zî waya mi tehdît kerdêne û vat, ‘eke ti çîyêk vajê ez o her hîrê domananê to zî bikşî.’ Waya mi zî tersan ra ma ra nêvana. Tena şîye qereqole ke derdê xo vajo, la seba ke tirkî nêzanayîne nêeşkaya derdê xo vaja. Reyke birazayê mi bi S.Pye dir şî qereqole û bi tirkî vatişê S.Pyî ard ziwan.”

	 

	‘Ma bi destê xo teslîmê polîsan kerd la...’

	 

	Hasanî dîyar kerd ke îxmalê qarakole serê nê caardişan de esto û vat: “Waya mi hende gerre qarakole de kerd la tu mudaxeleyêk nêame kerdene. Reyke tena polîsan ey destbend kerdî, la dimayê îfadeyê ci reyna serbest ame veradayene. Senîn ke serbest ame veradayene hêrişê waya mi kerdib û domananê ci kerdib. Domanan zî xeylê bi şîdetî dir rî bi rî mendibî. Ma reyke bi destê xo ey da polîsan la reyna zî serbest ame veradayene.”

	 

	‘Cuya waya mi binê tehluke de ya’

	 

	Hasanî dîyar kerd ke asayîşê waya ci çin o û vat: “Xeylê qeydê Zulkufî yê sûcî estê. Dizdî, çeko qaçax, esrar, nasnameyo sexte û seba şîdetê serê cinî. La polîsan o nêteêişnenê. Keyeyê Zulkufî zî eynî karî kenê. Nika Zulkuf zî birayê ey zî bi çek geyreno. Asayîşê keyeyê mi çin o. Vanê derdê xo polîsan ra vajê la polîsî zî bi xo çîyêk nêkenê. Ma do senîn bikerê. Bawerîya ma bi edaletî nêmenda. Her kes sûc keno û nîno tepiştiş. Eke Zulkuf bêro tepiştiş zî seba qanûnê efûkerdişî do bêro veradayene. Cuya waya mi binê tehlûke de ya.”