‘Ma bi muwazenê xozayî dir kay kenê û ma peynîya xo anê’ 2020-08-02 15:17:49   QERS - Teknîsyena weşîya ya Veterînerî Ayla Bîngole dîyar kerd ke şîdetê hemverê heywanan bigîrê çarçewaya sûcî û ganî her kes heqê heywanan bipawo û vat: “Ma bi miwazenê xozayî dir kay kenê û peynîya xo anê.”   Şîdetê serê heywanan zêde beno û seba gumanbaran zî tena cezaya pereyî yena birnayene. Heto bîn ra seranserê welatî de hetê Wezaretê Daristan û Ramitişî ra seydkerdişê 480 pezkovî, 39 bizinê koyî, 9 mêşinê xerîbî yê Anatolya, 14 xezal, 89 xezalê sûrî, 167 karacayî destûr da. Semedê qetilkerdişê pezkovîyan Dêrsim de îhale akerd û serê reaksîyonê raya pêroyî ame betalkerdene. La Çewlîk de îhaleyê qetilkerdişê heywanan rojeve de yo.   Teknîsneya weşîye ya veterîner û muhendîsa Zooteknî ya stargehê heywanan ê şaredarîya Qersî xebotyena, Ayla Bîngole derheqê şîdetê hemverê heywanan de qisey kerd.   ‘Her ca de hemverê heywanan îşkence esto’   Ayla dîyar kerd ke her cayê dinya de hemverê heywanan şîdet esto û vat: “Psîkolojîyê nê kesê ke vera ganeyê bêpawitoxan şîdet bi ca anê normal nîyê. Gelo merdimêk senîn serê heywanan de îşkenceyêko winasî keno. Zêdebîyayîşê şîdetî serê heywanan ramojneno ke welat de heywanî nînê pawitene. Ganî ma xo vîr ra nêkerê ke ma hemverê heywanan berpirsîyar ê. Ganî şîdetê hemverê heywanan bikewo çarçewaya sûcî.”   Ayla tewr peyîn vat ke wezaretî seba feydeyê xo wazeno pezkovîyan çin bikero û vera ke bêrê pawitene hewl yeno dayene bêrê qetilkerdene û vat: “No hewldayîşê qirkerdişî nîno qebûlkerdene. Ma bi muwazenê xozayî dir kay kenê û peynîya xo anê.”