Hîkayeyêka koçberî ya ke bi îşkence dest pêkerda 

2020-08-01 12:12:56


	 

	Hîkmet Tunç

	 

	WAN - Heybet Akkuşa ke rêça îşkence, koçberî, feqîrî û tedayan ramojnena, hîkayeya xo ke bi koçberî dest pêkerda pare kerd û vat: “Dimayê îşkenceyan ez bi rastîya Kurdbîyayîşê xo ameya rî bi rî.”

	 

	Serrê 90an de ke têkoşînê şarê Kurdî ya azadî û nasnameyî zî girs bi, bi hawayêko xidar rastê îşkence, teda, tepiştiş, tacîz û tecawizî ameyî. Yew înan ra Heybet Akkuşa ya 70 serrî ke Wan de ciwîyena ya.

	 

	Heybete wexto ke park de roniştî bî ma aye dî, çîyê ke cuyaya qal kerd.

	 

	Rastê îşkence ameye

	 

	Heybete qezaya Elkî de serrê 90an de hetê endamanê JÎTEMî yê ke yenê birayê ci bigîrê û nêvînenê, Heybete destbend kenê. Heybete ke bi rojan rastê îşkence yena wina vat: “Birayê mi geyrayî, ey nêdî. Mi ra vatî cayê ci vaje yan ma do to bigîrê. Mi zî vat, ez şima ra nêtersena û mi derb kerdî, destbend kerdî. Çimê mi padayî. Destê mi girê dayî. Cixara bedenê mi de tefnayî. Dimayê rojan ra dima çîyêk nêvînayî û ez vera dayî. Yew bi kufr kerdêne. Dimayê ke ez ameya veradayîş, bi rojan nêameya setê hemdê xo. Hema bedenê mi de rêça cixare esta.”

	 

	‘Dewlete bi zulmê xo Kurdan şîyar kerd’

	 

	Heybete dîyar kerd ke dimayê destbendkerdişî bi rojan nêameya serê hemdê xo û wina vat: “Yê ke îşkence bi mi kerdî, bi rojan verê çimanê mi ra nêşî. Hema zî wexto ke yeno vîrê mi sey a rojan biciwîyî. Mi zaf zulm dî. Îşkence bi mi ame kerdene. Ez hetê dedê xo ra zî şîdetî ameya. Bi îşkenceyî dir ez bi rastîyê Kurdbîyayîşê xo dir ameya rî bi rî. Dewlete esas de bi destê xo Kurdan şîyar kerd.”

	 

	‘Koçê Wanî kerd’

	 

	Heybet û keyeyê xo seba zulmî koçê Colemêrgî kenê û uca de zî dewlete fek înan ra vera nêdana. Heybete dimayê ke mêrdeyê ci mireno, koçê Wanî kena û uca de hetê ekonomî de probleman cuyena. Heybete wina dewam kerd: “Dimayê kênaya mi zewicya ma ameyî Tetwanê Bedlîsî. Reyan yena Wan, merdimê mi tîya yê.”