Qirkerdişê xoza dewam keno 2020-07-30 13:26:28   AMED - Tirkîya û li herême de qirkerdişê xoza dewam de yo û îqtîdaro ke êdî nêeşkeno serê lingan de vindero bi qirkerdiş û talankerdişê xoza hewl dano ke serê lingan de bimano. Licê de şewato ke verê di rojan vejîya her ke şono vila beno.   Serra 2019 de goreyê dayeyê fermî yê Wezaretê Kultur û Daristanan, bi komî Tirkîya de 5 hezar 469 hektar wareyê daristanan zirar dî û ameyî veşnaye. Reyna serra 2019 de gama ke xebatê hukmatî yê semedê daristanan merdim ewnîyeno çinkerdişê daristanan vîneno. Tirkîya ke pêro wareyan de gengeşe esto, no xo hetê babeta daristanan de zî ramojneno. Şitlê daran yenê ramitene, heto bîn ra zî daristanî yenê veşnayene. Sewbîna gama ke ma ewnîyayî sebebê çinkerdişê daristanan ra her çend ke sey şexsî bêro dîyarkerdene zî eslê xo de bi zanebîyayîş û seba dest ronayîş yeno kerdene.   ‘Bi seyan donimî ameyî çinkerdene’   Emsar zî şewatê daristanan hetê Tirkîya ra bi Mugla û Kutahya de dest pêkerd û dima ra bi şewatê ke Marmarîs û Antalyayî de vejîya bi seyan donim wareyê daristanî ameyî çinkerdene. Şewato ke vakurê Kurdistanî zî herêma Omeryanî 11ê Hezîrane de dest pêkerd, bi tesîrê vayî de bi rojan dewam kerd. Artukluyî Qesrê Ahmedî, Qurdîsî û Dara, Nesebîn de zî Xerabê Bava, Cinata Miho û Cinata Hiso, Mehsertêyî taxê Yestî û Rişvanî cayê bejayî de şewat vejîyabi û dima ra bi mudaxeleyê welatîyan ame tefênayene. Bi no hewa bi seyan donim wareyê daristanan veşa û bî welî.   ‘Mudaxele şewatî rê nîno kerdene’   Kurdistan de zî bi sebebê viraştişê qerekol, kelehkol û operasyonê leşkêrî her serre bi seyan hektar wareyê daristanî yenê veşnayene. Şirnex de koyî Cudî û sînorê qezaya Sîlopî de reyna şewat vejîyabi. Semedo ke derûdorê kelehkolî bi mudaxile nêamebi kerdene. Sewbîna Şirnex û koyê Gabarî de seba netîceyê operasyonê leşkerî adir koyî de vejîyabi. Eynî rewşe qezaya Pasûrî ya Amedî zî amebî meydan. Welatî veng dabî îtfaiyeya qayûmî la mudaxale nêamebi kerdene. Seba nê sebebî welatîyan goreyê îmkananê xo hewil dabî ke şewat bitefnê.   Licê de şewat    Sewbîna tewr peyîn bi di rojan serê sibayî dewê Dêrxûst, Sîsê, Cinezûr, Cimar û Henyatî yê girêdayê qezaya Licê de şewat vejîyabi.