Reaksîyonê hemverê hêrişê cinsî û tecawizî dewam keno 2020-07-24 15:55:03   Rojda Aydin   ŞIRNEX - Şirnex de reaksîyonê vera hêrişê cinsî yê hemverê domanan û cinîyan dewam keno. Cinîyê ke nêrazîbîyayîşê xo hemverê hêrişan dayî, dîyar kerdî ke vera nê hêrişan têkoşîn û xoverdayîşê înan dewam keno.   Demê peyîn de qirkerdiş û hêrişê vera cinîyan tewr zêde benê. Bi taybetî zî prosesê pandemî de qirkerdiş û şîdetê vera cinî û hêrişê cinsî vera domanan her şono zêde bî. Cinîyê Şirnexî reaksîyon hemverê hêriş û qirkerdişê cinîyan dayî û vatî ke qatilê cinîyan hetê dewlete ra yenê pawitene.   Hemşaredara Cizîrî ya ke vera ci qayûm ame tayînkerdene Bêrîvan Kutluye, destpêkê qiseykerdişê xo de hêriş û qirkerdişê cinîyan şermezar kerd û vat, demê peyîn de her ke şono nê hêrişî zêde benê. Bêrîvana wina vat: “Ma nêeşkenê ewro nînan yewbînan ra qut bikerê. Îqtîdar ewro wazeno bi qirkerdişê cinîyan çin bikero. Ma sey cinî hemverê nê hêrişê helwest û reaksîyonê xo her wext anê ziwan. Labelê cinîyê ke partîya AKP û partîyê bînan de reaksîyon vera nê hêrişan nêdanê. Her wareyê cuye de cinî yenê pelçiqnayene û cinî sey hacetêko rojane yenê xebitnayene. Coka hêrişî her ke şono zêde beno. Semedê polîtîqayê bêcezabîyayîşê qirkerdişî û hêrişê vera cinîyan tewr zêde bîyê. Seba kesê ke cinîyan qetil kenê û hêrişê înan kenê nînê cezakerdene, nê hêrişî zêde benê. Eke Serekkomarê Tirkîya Erdogan wexto ke vejîyo serê cinî û bedenê ci de qisey bikero, nê hêrişî zêde bibê. Demê peyînan de hedîse mîyanê HDPyî de zî ameyê ciwîyayîş û HDPyî prensîpê xo bi ca ardî. HDPyî derheqê nê kesan de çîyo lazim kerd. Ganî vera nê hêrişan ma vengê xo berz bikerê. Bêvengî qirkerdişê vera cinîyan zêde keno.”   ‘Qetilkerdişê cinîyan qetilkerdişê ciwîyayîşî yo’   Endama Meclîsê Cinîyan ê HDPyî ya Şirnexî Zîlan Ecevîte zî derheqê babete de wina vat: “Qetilkerdişê cinîyan, qetilkerdişê ciwîyayîşî yo. Senîn ke daristan, xoza û koyê ma yenê veşnayene, heywanê ma yenê qetilkerdene û cinî bi nê hawayî yenê qetilkerdene. Sebebê zêdebîyayîşê qirkerdişê cinîyan, seba polîtîqayê bêcezabîyayîşî yo. Kiştoxê cinîyan hetê dewlete ra yenê pawitene. Hêrişê vera cinîyan bi zanebîyayîş û plankerde yenê kerdene. Merdim nêeşkeno qirkerdişê xoza, daristan û cinî yewbînan rê cîya bigîro. Seba ke pêro girêdayeyê yewbînan ê. Îqtîdar wazeno Pêameyîşê Stenbolî werte ra wedarno. Vera nê hêrişan ganî têkoşîn û xoverdayîşî ma dewam bikero.”