‘Wedaritişê pêameyîşî do rayîrê muhakemeyî pado’ 2020-07-24 13:49:55   WAN - Endama Heyetê Îdarekarîya Komeleya Cinîyan a Starî Emîne Bozkurte dîyar kerd ke rewşa pêameyîşî bêro wedaritene de do pêro rayîrê muhakemeyî bêrê padayene û vat: “Antişê pêameyîşî, kiştiş û hêrişê hemverê cinîyan do biresno nuqtayêka cîya.”   Endama Heyetê Îdarekarîya Komeleya Cinîyan a Starî Emîne Bozkurte bale ante serê girîngiyê Pêameyîşê Stenbolî û ard ziwan ke Pêameyîşê Stenbolî ra vejîyayîş, do kiştiş û hêrişê vera cinîyan bîyaro nuqtayêka cîya.   ‘Îqtîdar wazeno ke cinîya yew tîp awan bikero’   Emîne bale ante serê îqtîdarî ke wazeno cinîya yew tîp awan bikero û wina vat: “Hêrişê cinsî yê vera cinî û domanan sewîyeyêka xidar de yo. Îqtîdar zî wazeno ke cinîya yew tîpe awan bikero. Semedê nê zî pêro îmkananê xo xebitneno. Hêrişê hemverê aktîvîst, sîyasetmedar û sazgehê cinîyan seba no yo. Wazenê ke komelêko cinî tede çin a awan bikerê. Bi teda, tepiştiş, destbendkerdiş, caardişê KHKyî û padayîşê sazgehan bikerê. La do serkewte nêbê.”   ‘Mîyanê AKPyî de heqê vatişê cinîyan çin o’   Emîne dîyar kerd ke serê vatişê serekwekîla koma AKPyî Ozlem Zengîne sey ‘verê AKPyî nameyê cinîyan çinbi’ û reaksîyonê xo wina ard ziwan: “Sîyasetê AKPyî de cinî estê, la heqê vatişê cinîyan çin o. Tena bi îmzeyan sînor ê. Vatişê înan çin o. Nêbenê wezîr. Îqtîdar komelî ser o zî mudaxaleyê cinîyan keno. Wexto ke cinîyêke rastê tacîzî yena bi terzê cil û belgê ci yena muhakemekerdene.”   ‘Wedaritişê pêameyîşî do pêro rayîrê muhakemeyî zî bigîro’   Emîne tewr peyîn qiseykerdişê xo de ard ziwan ke pêwa ke Tirkîya welato ke ewil pêameyîşê Stenbolî îmza kerda zî bi ca nêana û wina vat: “Muhakeme de problemê cidî estê. Pêwa çalakîyê ke ganî Pêameyîşê Stenbolî baş bi ca bêrê zî, bi ca nêame. Nika zî wazenê werte ra wedarênê. La rewşa ke pêameyîş bêro wedaritene do pêro rayîrê muhakemeyî bêrê padayene.”