
Bi qeydê vengî tehdîdê tecawizî yê destbendkerdişî de ame teşhîrkerdene 

2020-07-23 14:03:46


	&nbsp;

	ENQERE - Xoverdayoxa Yukselî Nazan Bozkurte gama ke destbendkerde bî vengê telefonê aye akerde mendib û dimayê mengan ra dima tehdîdê polîsî yê hemverê ci û Melek Çetînkaya teşhîr kerd. Nazane va, do derheqê polîsan de gerre bikerê û vat, eke ê teşhîr bikerê do êdî çîyêko wina nêro kerdene.

	&nbsp;

	Nazan Bozkurte ke bi KHKyî amebî îxrackerdene, Meydanê Yucelî yê Enqereyî de bi hîrê serrî yo ke çalakîya xo ya, ‘Ma karê xo wazenê’ dewam kena. Melek Çetînkaya zî seba lajê xo yê ke cezaya muebetî girewtib rayrayîşê ‘edaletî’ dabi destpêkerdene û Nazane wexto ke paştdayîş dabi çalakî ci amebî destbendkerdene. Destbendkerdiş de qeydê vengê telefonê ci akerde mendib û na rewşe dimayê mengan dima ferq kerd. Qeydê vengî de yeno vînayene ke polîsî tehdîdê cinsî û kufr Meleke û Nazane rê keno.

	&nbsp;

	Nazane vat, derheqê polîsê babeta vatişî de gerre bikerê.

	&nbsp;

	‘Destbendkerdiş de bi zor telefonê mi girewtî’

	&nbsp;

	Nazane wina vat: “Bi vengdayîşê Melek Çetînkaya ma 19ê Çele de beşdarê rayrayîşê edaletî bî. Polîsan dorê ma girewt. Ma destbend kerdî. Polîsan nasnameyê mi girewt. GBT zî derg dewam kerd. Mi zî vat, beno ke nêverdê ez dîmen bigîrî, ez qeydê vengî abikerî. Veng estbî. Qêrînayîş bî. Mi vat, qet nêbo ma bikerî xeber. Telefon cêbê mi de bi. Mi kerdib xo vîr ra ke, qeydê vengê mi zî akerdeyo. Dima ra telefonê mi cêbê mi ra vetibî.”

	&nbsp;

	Tehdîdê tecawizî qeydan de ame vînayene

	&nbsp;

	Nazane dîyar kerd ke qeydê vengî seranserê tepiştişî de dewam kerdo û vat: “Heta ke polîsan telefonê mi girewtê, pêro qiseykerdişî ameyê qeydkerdene. Mi telefonê xo girewt û goşdarî kerd. Qeydêko derg bi. Mi çend rojan goşdarî kerd. Vernê de mi ferq nêkerd. Dima ra min ferq kerd ke polîsî heqeretêko nêbaş bi mi û Melek Çetînkaya kenê. Xora yew estbi, her wext ma hedef girewtêne. Vanê ke ma do heta organê cinsî cigêrayîş bikerê. Ez serê nê de kewta tevger. Bi hîrê serrî yo ez Yuksel de yena destbendkerdene. Ez pêro wezîfedarê Mudirîyê Şubeyê Asayîşî nas kena. Coka ez wayîrê veng nas kena.”

	&nbsp;

	‘Eke ma teşhîr bikerê do wina nêkerê’

	&nbsp;

	Nazane dewamê qiseykerdişê xo de dîyar kerd ke tewirê îşkenceyî goreyê cinsî vuryeno û wina vat: “Gumanbarê hemverê kênaya serekkomar Esra Albayrake kufr kerdî ameyî destbendkerdene. Ganî nê polîsî zî bêrê destbendkerdene. Sûcê ma çibi? Ganî pîyê mi zî serekkomar bibo? Eke ma nînan teşhîr bikerê do reyke bîn wina nêbo.”

	&nbsp;