‘Zehmet bi la ez bi ser kewta’ 

2020-07-22 13:34:15


	 

	AGIRÎ - Suzan Surmelîya yew cinîyêka Agirî de demêk derg o esnafî kena ya. Suzan hingdarî kena û dikanê xo de hingimîn roşena. Suzane dîyar kena ke zehmet bîyo la aye bi ser kewta.

	 

	Cinîyê ke her wareyê ciwîyayîşî hewl yeno dayene ke bê tesîr bêrê verdayîş, vera sîstemê serdest ê camêrdan têkoşîn kenê û xo wareyan de bîyaye kenê. Suzan Surmelîya 58 serrî vera pederşahî 44 serrî yo ke bi keda xo wareyê ekonomîye de têkoşîn kena.

	 

	‘Vatî cinîyêke esta û peyser şî’

	 

	Suzane derheqê karê xo de wina qal kerd: “Agirî de cinîbîyayîş zehmet o. Wexto ke mektebe ra ez vejîyayîne şîne serê tezgahê xo û însanan mi vînayene û vatêne, ‘aaa cinîyêke tîya ya’ û şîne. Mi nê hedef kerdib; ez rincan bî zî ez o karê xo ramojnî. Zehmet bi la ez bi ser kewt a. Nika zî eke ez çinbî kes nîno dikan. Vanê, ‘Mamoste Suzane ça de ya’. Seba ke mi ra hes kenê. Kalîteyê hingimîno ke roşena verê çiman de yo. Ez rehet roşena.”

	 

	‘Cinîyan bidê her ca do probleman çareser bikerê’

	 

	Suzane dewamê qiseykerdişê xo de wina vat: “Temamê cuya xebata mi de mi hetkarî da xeylê kesan. Mi xeylê dost û embaz qezenc kerd. Mi domanê ke kuçeyan de tiryakî xebitnenê, derman kerdêne. Nika zî seba domanê kêna biwanê xebatan kena. Bi îmkananê xo ez destê xo dana înan. Ez o heta peynîya cuya xo zî bikerî. Cinî eşkenê her çî bikerê. Cinîyan bidê her ca do pêro probleman çareser bikerê.”

	 

	‘Ganî cinî tu ca de kêm nêmanê’

	 

	Suzane bale ante serê karê cinîyan û wina vat: “Keda cinîyan ê keyeyî bi tu hawayî nîna vînaye. Camêrdî zî vanê, ‘cinî heta şan de keye de nişnenê ro.’ Coka cinîyan azadîya ekonomîya xo bi dest nêkerda. Wa cinî her cayê cuye de ca bigîrê.”

	 

	Suzane tewr peyîn wina vat: “Mi 1972 de dewa Koyulhîsar Bahçekoyê Sêwasî de mamostetî kerdêne. Seba roşnkerdişî lambeya gazî zî çin bî. Mi çila fistêne. Goreyê adetê înan ciwîyaya. Mi awe antêne, mi nan dayîne tenûre ro. Mi cil û belgê înan dayîne xo ra. Nika ewnîyena her çî vurya. Telefonî ciwîyayîş vurnayê. Destê domananê qijan de zî telefon esto. Çiqas çîyêko şaş o. Êdî her çî tehmê xo vindî kerdo.”