Fatma pêwa pêro çîyan tezgahê xo akerd 2020-07-20 15:18:08   Fîlîz Zeyrek   EDENE - Fatma Çelena ke bazar de gilgil roşena, vera bêtêduştîyê esnafê camêrdan têkoşîn kena. Fatma 40 serrî yo tezgah akerd û wina debara xo kena û Fatma vat: “Hêzê mi biqasê 10 camêrdan o. Se kenê wa bikerê, ez xo keye de heps nêkena.”   Cinîyê ke her wareyê ciwîyayîşî de yenê vetene û hepsê keyeyî yenê kerdene, astengîyan yew bi yew vernîya xo ra wedarnenê. Fatma Çelena 61 serrî Edene de ciwîyena û zimistanî lane û hamnanî zî gilgil roşena. Fatma bi serran o hem têkoşînê cinîyan hem zî debare dana.   40 serrî yo bazarwanî kena   Fatma, bazarê panşemî yê taxa Şakîrpaşa yê Seyhanî de hewte ra 6 rojan şina bazar û gilgil roşena. Fatmaya ke 40 serrî yo debara xo kena wina vat: “Heta nika mi xeylêk bazaran de tezgah akerd. Esnafê camêrdî mi nêwazenê. Ez bi bêtêduştî dir rî bi rî menda. Hêzê qandê 10 camêrdan o. Ez bi nê zî serberz a. Ez qetî goreyê înan tênêgeyrena û xo hepsê keyeyî nêkena.   ‘Ez xeylê rey zirar kena   Fatmaya ke gilgil Kazanli yê Mersînî ra gêna û roşena wina vat: “Xeylê rey ma zirar kenê. Seba ke bazirganî nêbaş ê. Yê baş û xirab kenê têmîyan. Ez gilgil bi 1 TL roşena. Karê ci zêde çin o la pêwa nê xebityena. Seba ke karêko bîn çin o. Ez heta peynîya êlule ra gilgil roşena. Dima ra ez laneyan Nîgde ra ana.”   ‘Lazimîyê sebzeyê hewtane 250 TL yo’   Fatma pêwa ke her wext xebityena tena pereyê nanê xo qezenc kena û vat: “Ez seba bazarê ma reyan çîyanê xo erjan gêna. Hewtane sebze û fêkîyê xo bi 250 TL gêna. Ez nêeşkena domanêke xo wey bikerî, gelo yê ke wayîrê 5 domananê se kenê. Rewşa esnafan zî zehmet a. Verê nîzamêk tîya bi. Nika xeylê kesî bi kaçaxî kewtê bazar. Verê 10 metrekare cayê mi bi, nika 3 metrekare dayê mi.”   ‘Çira ez bazar de nêxebityî’   Fatma tewr peyîn qiseykerdişê xo de veng da pêro cinîyan û vat: “Cinî her ca de eşkenê bixebityê. Sazgehê dewlete, pakitîyê keyeyî de, sey şofor, avûkat, doktor û mamoste. Gelo çira ez bazar de nêxebityî. Tu teda bi mi nêeşkeno peyser game bido eştene.”