Verê ke zanayîş bidê avûkatan dewa ameye vînayene 

2020-07-15 14:57:20


	 

	Safiye Alagaş

	 

	AMED - Ame dîyarkerdene ke 1in roniştişê dewa Komeleya Cinîyan a Rosaye bi lez û bez verê mesaî bi 5 deqeyan 4in Dadgeha Cezaya Giran ya Amedî de ameye vînayene.

	 

	22ê Gulane de Amed de hemverê Komeleya Cinîyan a Rosaye operasyon ame kerdene û 13 cinî ameybî tepiştene. Serdozgerîya Komara ya Amedî, derheqê sereka komele Adalet Kaya û endama komele Remzîye Siziciye rê sûcê, ‘endamîya rêxistine’ îdianame amade kerd û pêşkêşê 4in Dadgeha Cezaya Giran ya Amedî kerd. Dadgehe îdianame qebûl kerd û yewin roniştişê 11ê Hezîrane de ame vînayene.

	 

	Dadgehe roniştişê tensîpî de waştiş kerd ke nimûneyê îdianmeyî Adalet û Remzîye rê bêrê eşrawitiş û roniştiş taloqê 9ê Temmuze ame kerdene.

	 

	Waştiş ame redkerdene

	 

	Adalet û Remzîye sewbîna 11in Dadgeha Cezaya Giran zî bi îdiaya ‘serê nameyê rêxistine sûc kerdê’ yenê muhakemekerdene. 4in Dadgeha Cezaya Giran 11in Dadgeha Cezaya Giran rê muzakkere nuşt û îdia kerd ke her di dosya girêdayê yewbînan ê û ganî bibê yew. 11in Dadgeha Cezaya Giran zî nuştiş nuşt û îda kerd ke tarîxê sûcî cîya yê û red kerd.

	 

	Roniştiş saete 16.55 de ame vînayene

	 

	Balkêş oyo ke 4in Dadgeha Cezaya Giran, dimayê redkerdene, celseyêko newe akerd û 3’ê Temmuze de roja îne de saete 16.55 de bi lez û bez roniştiş kerd. Dadgeha zanayîş nêda Adalete, Remzîye û avûkatanê înan. Dadgehe derheqê Adelete û Remzîye de qerarê dewamkerdişê tepiştişî da.

	 

	Avûkatanê Adalete û Remzîye êyê ke seba roniştişê 9ê Temmuze xo amade kerdêne zî seba dewa kampanya dest pêkerdî. Avûkatan 7ê Temmuze de mûsayî ke roniştiş 3ê Temmuze de ameyo kerdene.