‘Ez her roje bi endîşe wirzena’ 

2020-07-13 14:49:53


	 

	AGIRÎ - Keve Aslane ke lajê aye tepişte yo dîyar kerd ke aye seba vîrusî cuya lajê xo bi endîşe ya û vat: “Ma her roje bi endîşe wirzenê. Ganî qanûnê înfazî hepsîyê sîyasî zî feyde bigîrê.”

	 

	Hepsîyê sîyasî yê sererastkerdişê înfazî ra feyde nêgirewtî, seba vîrusê koronayî binê rîskî de yê. Endîşeyê keyeyan zî roj bi roje zêde benê. Murat Aslan, zîndanê Tîpa T yê Hûmara 2yê Bandirmayî de tepişte yo. Dayîka ci Keve Aslane endîşeyê xo ard ziwan û vat: “Ez tersena ke lajê mi vîrus bibo.”

	 

	Murat Aslano 2012 de bi sucdarîyê, ‘endamîyê rêxistine’ ame tepiştiş û 5 serran zîndanê Tîpa L yê Panosî de maneno û dima ra surgunê zîndanê Bandirmayî yeno kerdene. Keve dîyar kerde ke lajê aye ame surgunkerdene û ne destê aye reseno û ne zî çimê aye vîneno û vat: “Serrêke yo mi lajê xo nêdîyo. Seba weşîye û ekonomîye ma, ma nêeşkenê şorê. Ez nêweşa kanser, tansîyon û şekirî ya. Ganî bi teyare şêrî la nêeşkena şêrî.”

	 

	Keve, dîyar kerd ke verê ke mêrdeyê ci wefat bikero, seba Murat bêro, waştişname dayo la nêameyo qebûlkerdene û vat: “Mêrdeyê mi zî nêweşê qelbî bi. Gerek teyare espar nêbîne. Ma waştişname de nê vat. Ma vat, qe nêbo nêzdîyê ma bo. La dozgerî vat, ‘Ez o bierşawî cayêko wina do destê kesî nêreso.” 

	 

	Keve, dîyar kerd ke prosesê pandemî de îhlalkerdişê heqan dewam keno û wina vat: “Koxuşe de 20 hepsî manenê. Werdiş, hacetê pakitî kêm yenê dayene. Rastê îşkenceyan yenê. Gama ke ma şîne pêvînayîşan, gardîyanan cigêrayîşêko pîl kerdêne. Seba vîrûsî nika ez cuya lajê xo rê bi endîşeyîn a. Ez hesreta lajê xo ciwîyena.”