‘Ganî ma vera şerî bibê yew’ 

2020-07-11 14:50:46


	 

	QERS - Cinîyê Qersijî reaksîyon vera hêrişê demê peynî yê hemverê herêmanê kurdan ramojnayî û dîyar kerdî ke bi yewîya neteweyî eşkenê cewab bidê hêrişê hemverê şarê Kurdî.

	 

	Demê peyîn de arteşa tirkî hemverê Herêma Federal a Kurdistan û Vakur û Rojhelato Sûrîye hêriş kerd. Cinîyê Qersijî reaksîyonê vera dayî û dîyar kerdî ke şarê Kurdî bi yewîya neteweyî eşkenê cewab bidê hêrişan û vatî ganî xebatê yewîya neteweyî bêrê destpêkerdene.

	 

	Gever Aktaşe da zanayene ke ganî kurdê ke her çar het de yê dest bidê yewbînan û vat: “Roj êdî roja yewbîyayîşî ya. Seba ke ma peynîya zulmî bîyarê, ganî ma bibê yew. Ewro bi seyan kurdî zîndanan de yê. Ma nêeşkenê bedelê ke înan dayê nêvînê. Êdî bes o. Ganî ma vera îqtîdarê şerwaştox vinderê.”

	 

	Turkan Aylîne zî ard ziwan ke tewr zêde şer ra cinî tesîr benê û vat: “Wa ciwanê ma nêmirê. Do no şer heta key dewam bikero. Ganî ma dest bidê serê wijdanê xo û vera şerî bibê yew. Êyê ke tewr zêde şer ra tesîr benê dayîk ê.”

	 

	Emîne Ozkane zî wina vat: “Wa peynîya şerî bêro, wa êdî gonî nêrişnê. No hêrs do heta key dewam bikero. Ma bi serran o aştîye wazenê. Ma heta nê emrî ameyî la ma rehetî nêdî. Qet nêbo ma seba şarê kurd êdî çîyêko baş bivînê û na dinya ra koç bikerê.”

	 

	Zeynep Saye zî dîyar kerde ke ganî şarê kurdî vera şerî yewîye bi ca bîyaro û wina vat: “Ma sey welatî ciwîyenê û wa êdî bîyayîşê şatê Kurdî bêro vînayene. Ma bi serran o têkoşîn kenê, bedel danê. Ganî ma vera şerî bibê yew. Ma dayîkê kurdî tu çîyêk cuya xo ra ma fam nêkerd. Wa êdî edelet bêro.”