‘Ma nêeşkenê bi domananê xo dir pêvînayîş bikerê’ 

2020-07-10 12:30:54


	 

	Rojda Aydin

	 

	ŞIRNEX - Zîndan de îhlalkerdişê heqan serê hepsîyê sîyasîyan de peynî nêbenê û na rewşe zî keyeyan kena mîyanê endîşeyî. Leyla Ayasa ke lajê ci Zîndanê Tîpê E yê Orduyî de hepsî yo dîyar kerd ke seba ke lajê ci beşdarê grevê vêşanîye bîyo, cezaya qedexekerdişê qiseykerdene telefonî ci rê ameya birnayene û wina vat: “Seba rewşa şubeyî, ma nêeşkenê şêrê pêvînayîşê domananê xo û ma bi telefon qisey kenê. La telefon zî qedexe kerdê, ma do senîn pêvînayîş bikerê. Ma nê qebul nêkenê. Wa ceza îptal bikerê." 

	 

	Zîndanan de her wext îhlalkerdişê heqan yenê rojeve. Nê îhlalkerdişî wextê pandemî de zêdeyêr bî. Yew nê zîndanan ra zî zîndanê Tîpê E yê Orduyî yo. Zîndanê Orduyî yê Tîpê Eyî de hepsîyê ke seba heqê xo û ê hepsîyê nêweşan bipawê, wextêk beşdarê grevê vêşanîye bîyê û mengêke cezaya hucreyî înan rê ameya birnayene. Yew nê hepsîyê ke bi ceza dir rî bi rî mendo, Kerem Ayas o. Dayîka Keremî, Leyla Ayase ke derheqê lajê xo de zanayîş da reaksîyon îhlalkerdişê heqanê serê hepsîyan de da.

	 

	Leyla Ayase, ard ziwan ke lajê aye 2016 de wextê qedexeyê tebervejîyayîşê kuçeyan de hetê polîsan ra ameyo destbendkerdene û dima ra ameyo tepiştene. Leyla vat ke lajê aye bi hawayêk bêhuqûqî ameyo tepiştiş û nê vat: “Lajê mi 5 serrî yo ke hepsî yo. Heta nika surgunê xeylêk zîndanan ameyo kerdene. Wexto ke newe ame tepiştene, sere de nêzdîyê 3 mengî zîndanê Şirnexî de mend, dima ra surgunê zîndanê Dîlokî kerdî. Uca de lajê mi waşt ke şêro verê hepsîyanê sîyasîyan la ca çinbi û dimayê mengêke reyna surgun kerdî û erşawitê Zîndanê Sîncanî. Bi nêzdîyê 3 serrî yo zîndanê Sîncanî de maneno.”

	 

	‘Ma weşîye domananê xo ra endîşeyîn ê’

	 

	Leyla, dewam de wina vat: “Domanê ma zîndan de yê û rewşa înan baş nîya. Seba ke ê mîyanê çar dêsan de yê nêeşkenê pawitişê xo bikerê, ma xeylêk tersenê. Xeylêk hepsîyê edlî û tecawizkaran bi paketa hukmî ameyî veradayene. La hepsîyê sîyasîyan vera nêdayî. Dimayê prosesî asanbîyayîşî, heme cayan de ciwîyayîş sey verê ame dewamkerdene. Labelê zîndanan de rewşe wina nîya. Seba korona, pêro bernameyê hepsîyan amebi qedexekerdiş û nê qedexeyî rewşa normalî de nînê peynîkerdiş. Sewbîna heto bîn zî hacetê pakitî û awa şimitişî nêdanê domananê ma. Awa lêşîne danê înan. Domanê ma do senîn awa lêşîne bişimê.”

	 

	‘Cezaya telefonî yê mengêke birnayî’

	 

	Leyla derheqê îhlalkerdişan de wina vat: “Domanê ma wazenê hepsîyê nêweşî bêrê veradayene. Lajê mi bi rayîrê telefonî ard ziwan ke rewşa hepsîyê nêweşan baş nîya. Lajê mi ard ziwan ke hepsîyê nêweşan nêbenê nêweşxane. Seba ke lajê mi û embazê ci beşdarê grevê vêşanîye bî, înan rê cezaya pêvînayîşî birnayî. Seba nêweşîye ma nêeşkenê şêrê zîndan, bi tena heqê înan ê telefonî esto o zî qedexe kerdî. Ma do senîn domananê xo dir pêvînayîş bikerê, ma nê qebul nêkenê.”

	 

	‘Wa waştişê domananê ma bi ca bîyarê’

	 

	Leyla tewr peyîn qiseykerdişê xo de vat, wa waştişê domananê înan bi ca bêro û wina vat: “Wa cezaya ke domananê ma rê birnayî îptal bikerê. Ma do senîn domananê xo ra zanayîş bigîrê. Waştişê ma oyo ke domanê ma zî serbest bêrê veradayene. Wa pêro hepsîyê sîyasîyan vera bidê.”