
Ocaxê qumî benê sebebê merdişan! 

2020-07-07 11:59:00


	&nbsp;

	ŞIRNEX - Cizîrê Şirnexî de ocaxê qumî zêde benê û no çi rayîr merdişan rê akeno. Endama Meclîsê Pêroyîya HDPyî ya Şirnexî Şîrîn Kilinçe dîyar kerde ke ganî wezîfedarî hemverê na rewşe trdbîran bigîrê yan zî ocaxanê qumî padê.

	&nbsp;

	Çemê Dîcleyî seba ocaxanê qumî nika bîyo cayê mergî. Cizîrê Şirnexî de hûmara ocaxanê qumî yê Çemê Dîcleyî zêde beno û nika 5 ocaxê qumî Cizîr de estê. Ocaxê qumî ke bi her tewir zirar dano xoza, seba welatîyan zî beno sebebê mergî. Seba xebatê ke tîya yenê kerdene, mîyanê çemî de bîr virazênê. Mîyanê 3 serrê peyînan de seba nê mîyan de domanî zî estbî 20 kesî zêdeyêr welatî xeniqyayî.&nbsp;

	&nbsp;

	‘Ma meclîs ra waşt ke ocaxê qumî bêrê padayene’

	&nbsp;

	Derheqê babete de endama Meclîsê Pêroyî ya Şirnexî ya Partîya Demokratîke ya Şaran (HDP) Şîrîn Kilinçe qisey kerde û vat ke seba ocaxê qumî, her serre bi seyan însanî cuya xo vindî kenê û wina vat: ”Cayêko sey Cizîrî seba ke hamnanî zaf germ beno welatîyê qeza, semedê xo honik bikerê kewenê awe. Labelê seba ocaxê qumî çem de bîr yenê meydan û no zî beno sebebê merdişê welatîyan. Seba ke na xebate ocaxê qumî bêrê vindarnayene, ma pêşnîyaz meclîsî rê kerd. La heta ewro zî meclîsî tu cewab nêdayo.”

	&nbsp;

	‘Wa demêko nêzdî de tedbîran bigîrê’

	&nbsp;

	Şîrîne tewr peyîn qiseykerdişê xo de bale ante serê tedbîran û vat: “Ganî wezîfedarî tedbîran bigîrê yan zî wa nê ocaxê qumî bêrê vindernayîş. Ocaxê qumî benê sebebê merdişê însanan. Ma êdî nêwazenê ke welatîyê ma awe de bixeniqîyê û cuya xo vindî kenê. Eynî wextî de mîyanê zergûnayê Çemê Dîcleyî de xeylêk heywan estê. Labelê seba ocaxê qumî zergûnayê zirar dîyê û no zî beno sebebê merdişê heywanan zî. Ma wazenê demêko nêzdî de tedbîran bigîrê.”

	&nbsp;

	Walîtîyê Şirnexî, derheqê babete de eşkarîyêk da û dîyar kerd ke seb xetereyê xeniqnayîşî kewtişê awe seranserê bajarî qedexe kerdo. Walîtî, da zanayene ke kesê ke qedexe îhlalbikerê do bêrê cezakerdiş.

	&nbsp;