
'Vera hêrişan ganî bêvengî bêro şikitiş' 

2020-06-26 13:58:52


	&nbsp;

	&nbsp;

	AMED - Reaksîyon vera hêrişê Mexmûrî, Şengal, Qendîl û Kobanî de dewam kenê. Endamê Meclîsê Dayîkê Aştîye yê Amedî hemverê bêvengîye reaksîyonê xo ramojnayî û vatî: "Ganî îxanetê mîyanê kurdan biqedîyo."

	&nbsp;

	Teyareyê şerî yê Arteşa Tirkî hêrişê Wargehê Multecîyan ê Şehîd Rûstem Cûdî (Mexmûr), Şengal, Qendîl û Biradost, Şêladiz û Kobanî kerd. Reaksîyon û nêrazîbîyayîş hemverê hêrişan dewam kenê. Endamê Meclîsê Dayîkê Aştîye yê Amedî hêriş şermezar kerdî û vengdayîşê xoverdayîşî kerdî.

	&nbsp;

	'Ganî ma bibê yew'&nbsp;

	&nbsp;

	Raîfe Ozbeye bale ante serê yewîya neteweyî û dîyar kerde ke heta ke kurd nêbê yew do xetere dewam bikerê. Raîfe, wina dewam kerd: "Waştişê heme kurdan awankerdişê yewîya neteweyî yo. No het ra zî rolê vaşûrê Kurdistanî girîng o, lazimo ke Vaşûr nêbo şirîkê îşxalkerdoxan. Amancê îşxalkerdişî oyo ke mîyanê kurdan de birakiştişî bi ca bîyarê. Xora no sebeb ra ma hema zî nêeşkenê bibê yew. Çira Vaşur de pirrî mît û ajan estê. Birakiştişî ra çîyêk nêkeweno destê însanî û ganî no îxanet bêro peynîkerdene. Wa êdî fek nê çîyan ra vera bidê. Seba ke merdimî wayî û birayê xo nêdê kiştiş. Zerrîya ma ganî pîya bo, gama ke ma bibê yew, yew hende asanî nêeşkeno hêrişan bikero. Gama ke KDP destûr nêdo dewleta tirkî, o wext nêeşkeno hende hêrişê serê herra Kurdistanî bikerê. Seba çi serê Wargehê Mexmûr û Şengalî de hêriş kenê û sivîlan hedef gênê. Şengalo ke serra 2014 de destê ÎŞÎD ra xilas bibi, ewro reyna bidestê dewleta tirkî û vaşûrî ra rastê hêrişan yenê."

	&nbsp;

	'Çira bêveng ê'

	&nbsp;

	Makbûle Ozbeke, bale ante serê bêvengîya ke ameya awankerdene û wina vat: "Wa kurdî bawerîya xo tu kesî rê nêarê. Çimê her dewlete serê herra Rojhelato Mîyanên de yo. Kurdistan de berjewendîyê pêro dewletan esto, çira vaşûr berjewendîyê tirkan rê veng nêkeno. Seba babeta kurdan, serê dinya de tu heqê merdimayî derbaz nêbeno. Ganî kurdî zulmê serê şarê xo de bêveng nêmanê."

	&nbsp;

	'Wa îxanet biqedîyo'

	&nbsp;

	Nazîme Yureke zî hêrişê dewleta tirkî yê serê Mexmûr, Şengal û Qendîlî şermezar kerd û vat: "Her wiştişê teyareyê şerî de, ma xemgîn û bi endîşe benê. Waştişê ma yê dayîkê aştîye oyo ke wa êdî hesrê çimanê dayîkan nêvarê. Rengê heme hesirê dayîkan sey yewbînan o. Wa êdî îxanetê mîyanê kurdan biqedîyo û bibê yew."

	&nbsp;